ഗോവിന്ദാപുരം: പാലക്കാട് എക്‌സൈസ് സ്‌പെഷ്യല്‍ സ്‌ക്വാഡ്, കാറില്‍ കടത്തുകായായിരുന്ന ഒരുകിലോയോളം കഞ്ചാവുമായി എറണാകുളം സ്വദേശികളായ യുവാക്കളെ പിടികൂടി. ഐവിന്‍ (21), മന്‍ഷാദ് (22), അഹമ്മദ് സഹന്‍ (19) എന്നിവരാണ് അറസ്റ്റിലായത്. ഗോവിന്ദാപുരം സെയില്‍സ് ടാക്‌സ് സര്‍വെയ്‌ലന്‍സ് ആന്‍ഡ് സ്‌ക്വാഡ് ക്യാംപ് ഓഫിസിനു മുന്‍വശം നടത്തിയ വാഹനപരിശോധനക്കിടെയാണ് ഇവരെ പിടികൂടിയത്.
പൊള്ളാച്ചിയില്‍നിന്നും 20,000 രൂപക്ക് വാങ്ങിയ കഞ്ചാവ് എറണാകുളം ജില്ലയില്‍ ചില്ലറ വില്‍പ്പന നടത്തുവാനായാണ് കടത്തിയതെന്ന് പ്രതികള്‍ സമ്മതിച്ചു. വാഹന പരിശോധന കണ്ടു തിരിച്ചുപോകാന്‍ ശ്രമിച്ച വാഹനത്തിനെ ഡ്യൂട്ടിയില്‍ ഉണ്ടായിരുന്ന ജി.എസ്.ടി വകുപ്പിന്റെയും നാട്ടുകാരുടെയും സഹകരണത്തോടെ പിടികൂടുകയായിരുന്നു. കഞ്ചാവ് കടത്താന്‍ ഉപയോഗിച്ച കാറും കസ്റ്റഡിയില്‍ എടുത്തു. ഇതില്‍ ഐവിന്‍ മുന്‍പും കഞ്ചാവ് കേസില്‍ പ്രതിയാണ്.
തുടര്‍ച്ചയായി രണ്ടാമത്തെ ദിവസമാണ് എക്‌സൈസ് സ്‌ക്വാഡ് പാര്‍ട്ടി കാര്‍ സഹിതം കഞ്ചാവ് പിടികൂടുന്നത്. വാഹന പരിശോധന കൂടുതല്‍ ശക്തമാക്കുമെന്ന് സ്‌ക്വാഡ് സര്‍ക്കിള്‍ ഇന്‍സ്‌പെക്ടര്‍ എം. രാകേഷ് അറിയിച്ചു. എക്‌സൈസ് ഇന്‍സ്‌പെക്ടര്‍ ടി. രാജീവിന്റെ നേതൃത്വത്തില്‍ പ്രിവന്റീവ് ഓഫിസര്‍മാരായ സുമേഷ്, മനോജ്കുമാര്‍, വിപിന്‍ദാസ്, പ്രസാദ്,മന്‍സൂര്‍ അലി,അജിത്കുമാര്‍, സിവില്‍ എക്‌സൈസ് ഓഫിസര്‍മാരായ ബിനു, പ്രസാദ്, രതീഷ്, ശ്രീകുമാര്‍, പ്രീജു, ഡ്രൈവര്‍ ശെല്‍വകുമാര്‍ എന്നിവര്‍ പരിശോധനയില്‍ പങ്കെടുത്തു.