മണ്ണാര്‍ക്കാട് : നഗരത്തില്‍ എ.എസ്.പി. പട്ടയം ഉടമകളെ സഹായിക്കുന്ന നിലപാടാണ് റവന്യു വകുപ്പ് സ്വീകരിച്ചതെന്ന് താലൂക്ക് വികസന സമിതിയില്‍ റവന്യു വകുപ്പിനെതിരെ അംഗങ്ങളുടെ ആരോപണം. സ്വാകര്യ വ്യക്തികളുടെ സ്ഥലങ്ങള്‍ ദേശീയ പാത വികസനത്തിനായി ഒഴിപ്പിച്ചെടുത്തപ്പോള്‍ സര്‍ക്കാരിനു കൂടി അവകാശമുണ്ടെന്നു പറയുന്ന എഎസ്പി പട്ടയ ഭൂമി കൈവശമുള്ളവര്‍ക്ക് കോടതിയില്‍ പോകാനുള്ള സൗകര്യം റവന്യു വകുപ്പ് ചെയ്തുകൊടുത്തെന്ന് അംഗങ്ങള്‍ ആരോപിച്ചു.
ഒറ്റപ്പാലം മുന്‍ സബ് കലക്ടര്‍ പി.ബി.നൂഹിന്റെ നേതൃത്വത്തില്‍ നടപ്പാക്കിയ ഓപ്പറേഷന്‍ അന്തസത്ത കളഞ്ഞു കുളിക്കുന്ന നിലപാടാണ് റവന്യു വകുപ്പ് പ്രവര്‍ത്തിച്ചത്. നഗരത്തില്‍ ദേശീയ പാത വികസനം സാധ്യമാക്കുകയെന്ന ലക്ഷ്യത്തോടെയാണ് ഓപ്പറേഷന്‍ അനന്ത നടപ്പാക്കിയത്. എന്നാല്‍ എഎസ്പി പട്ടയം ഭൂമിയുള്ളിടത്തെല്ലാം ദേശീയ പാത വികസസനം അനിശ്ചിതത്വത്തിലായതിനു കാരണം റവന്യു വകുപ്പാണ്.
ഇക്കാര്യത്തില്‍ തീരുമാനം ഉണ്ടാക്കാന്‍ റവന്യു വകുപ്പ് ഒന്നും ചെയ്യുന്നില്ലന്നും അംഗങ്ങള്‍ ആരോപിച്ചു. എഎസ്പി പട്ടയം ഉടമകള്‍ കോടതിയില്‍ പോയ സാഹചര്യത്തില്‍ നടപടിക്ക് തടസമുണ്ടെന്ന് റവന്യു വകുപ്പ് ഉദ്യോഗസ്ഥര്‍ പറഞ്ഞു. കോടതിപ്പടിയില്‍ പൊതുമരാമത്ത് ഓഫിസിന്റെ മതില്‍ പൊളിച്ചു ദേശീയ പാത അഴുക്കുചാല്‍ നിര്‍മിക്കണമെന്ന് താലൂക്ക് വികസന സമിതി ആവശ്യപ്പെട്ടു. ഈ ഭാഗത്ത് റവന്യു വകുപ്പ് പരിശോധന നടത്തുമെന്ന് തഹസില്‍ദാര്‍ പറഞ്ഞു.