കുട്ടനാട്: വയനാട് സ്വദേശികള്‍ സഞ്ചരിച്ചിരുന്ന കാര്‍ എ.സി കനാലിലേക്ക് വീണു. യാത്രക്കാര്‍ അത്ഭുതകരമായി രക്ഷപെട്ടു. കാറില്‍ നാല് സ്ത്രീകളും രണ്ടു പുരുഷന്‍മാരും ഉണ്ടായിരുന്നു. കാറിന്റെ ചില്ലുകള്‍ പൊട്ടിച്ചാണ് ഇവരെ നാട്ടുകാര്‍ പുറത്തെടുത്തത്. കാര്‍ കനാലിന്റെ തീരത്ത് വീണതിനാലാണ് അപകടം ഒഴിവായത്. നിസാര പരിക്കേറ്റ ഇവരെ ആലപ്പുഴ ജനറല്‍ ആശുപത്രിയില്‍ പ്രവേശിപ്പിച്ചു. ചങ്ങനാശേരിയില്‍നിന്ന് വയനാട്ടിലേക്ക് പോവുകയായിരുന്ന കാറില്‍ ഓവര്‍ടേക്ക് ചെയ്തു വന്ന ലോറി തട്ടിയാണ് കനാലിലേക്ക് മറിഞ്ഞത്. ഇന്നലെ രാമങ്കരി പഞ്ചായത്ത് ഓഫീസിന് മുന്നില്‍ വെച്ചായിരുന്നു അപകടം. ലോറി കാറില്‍ തട്ടിയതറിയാതെ ഓടിച്ചുപോയി. സ്ഥലത്തെത്തിയ രാമങ്കരി പോലീസ് വിവരം അറിയിച്ചതിനെ തുടര്‍ന്ന് നെടുമുടി പോലീസ് ലോറി കസ്റ്റഡിയിലെടുത്തു. ആലപ്പുഴ സ്വദേശിയുടേതാണ് ലോറി. ലോറി ഡ്രൈവര്‍ക്കെതിരെ അലക്ഷ്യമായി വാഹനം ഓടിച്ചതിന് രാമങ്കരി പോലീസ് കേസ് എടുത്തു.