തിരുവനന്തപുരം: അബുദാബി,ഷാര്‍ജ,ദുബായ് എന്നിവിടങ്ങളില്‍ നിന്നും ഇന്നും നാളെയുമായി തിരുവനന്തപുരം വിമാനത്താവളത്തില്‍ എത്തുന്ന 1200 പേരെ നിരീക്ഷണ കേന്ദ്രത്തിലാക്കാന്‍ തീരുമാനം. അതിനായി 50 കെ.എസ്.ആര്‍.ടി.സി ബസുകള്‍ ഉടന്‍ എത്തിക്കാന്‍ മോട്ടോര്‍ വകുപ്പിന് നിര്‍ദേശം നല്‍കി.എല്ലാ മോട്ടോര്‍ വെഹിക്കിള്‍ ഉദ്യോഗസ്ഥരോടും ഡി.എം.ഒ ഓഫിസില്‍ റിപ്പോര്‍ട്ട് ചെയ്യാന്‍ നിര്‍ദേശിച്ചു.

ഇന്ന് വൈകുന്നേരം 4മണി മുതല്‍ നാളെ എട്ട് മണിവരെയാണ് ബസുകള്‍ വിമാനത്താവളത്തില്‍ സര്‍വിസ് നടത്തേണ്ടത്. വിമാനത്താവളത്തില്‍നിന്ന് യാത്രക്കാരെ ഡി.എം.ഒ പറയുന്ന ആശുപത്രിയിലേക്ക് കൊണ്ടുപോകണം. ആവശ്യമുള്ള ബസുകള്‍ വിട്ടുനല്‍കാനും കെ.എസ്.ആര്‍.ടി.സി തീരുമാനിച്ചു.