പട്‌ന: അധികാരത്തില്‍ വന്നാല്‍ എല്ലാവര്‍ക്കും മിനിമം വരുമാനം ഉറപ്പാക്കുമെന്ന പ്രഖ്യാപനത്തിന് പിന്നാലെ രാജ്യത്തെ മുഴുവന്‍ കാര്‍ഷിക കടങ്ങളും എഴുതി ത്തള്ളുമെന്ന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി.

കഴിഞ്ഞ നിയമസഭാ തെരഞ്ഞെടുപ്പില്‍ അധികാരത്തിലേറിയാല്‍ കാര്‍ഷിക കടങ്ങള്‍ എഴുതിത്തള്ളുമെന്ന് പ്രഖ്യാപിച്ചിരുന്നു. തുടര്‍ന്ന് മധ്യപ്രദേശ്, രാജസ്ഥാന്‍, ഛത്തിസ്ഗഡ് സംസ്ഥാനങ്ങളില്‍ അധികാരത്തില്‍ വരികയും തെരഞ്ഞെടുപ്പ് പ്രാചാരണത്തിലെ പ്രഖ്യാപനം നടപ്പാക്കുകയും ചെയ്തിരുന്നു.
ഇതേ രീതിയില്‍ തന്നെ രാജ്യത്ത് അധികാരത്തില്‍ വന്നാല്‍ സര്‍ക്കാര്‍ മുഴുവന്‍ കാര്‍ഷിക ലോണുകളും എഴുതിത്തള്ളുമെന്നാണ് ഇന്നലെ പട്‌നയില്‍ നടന്ന റാലിയില്‍ വ്യക്തമാക്കിയത്.

ആര്‍.ജെ.ഡി ഉള്‍പ്പെടെയുള്ള പ്രതിപക്ഷ പാര്‍ട്ടി നേതാക്കളും റാലിയില്‍ രാഹുലിനൊപ്പം വേദി പങ്കിട്ടു. ബജറ്റിലൂടെ ബിഹാറിലെയും രാജ്യത്തെയും കര്‍ഷകരെ മോദി അവഹേളിച്ചിരിക്കുകയാണ്. ഇതിന് തക്കതായ മറുപടി അവര്‍ തെരഞ്ഞെടുപ്പില്‍ നല്‍കുമെന്ന കാര്യത്തില്‍ സംശയം വേണ്ടെന്നും അദ്ദേഹം കൂട്ടിച്ചേര്‍ത്തു.

രാജ്യം അഞ്ചുവര്‍ഷമായി ഭരിച്ചിട്ടും പരിഹരിക്കാത്ത പ്രശ്‌നങ്ങള്‍ ഇടക്കാല ബജറ്റ് അവതരിപ്പിച്ച് പരിഹരിക്കുമെന്നത് ഒരിക്കല്‍പോലും യാഥാര്‍ഥ്യമാകാത്തതാണെന്നും രാഹുല്‍ ആരോപിച്ചു.