ലണ്ടന്‍: ഇംഗ്ലണ്ടിലേക്കുള്ള യാത്രക്കിടെ വിമാനം തകര്‍ന്ന് കാണാതായ ഫുട്‌ബോള്‍ താരം എമിലിയാനോ സലയുടെ മൃതദേഹം കണ്ടെത്തി. ജനുവരി 21ന് കാണാതായ വിമാനത്തിന് വേണ്ടി മൂന്ന് ദിവസം തിരച്ചില്‍ നടത്തിയെങ്കിലും ഒന്നും കണ്ടെത്താനായില്ല. തുടര്‍ന്ന് തിരച്ചില്‍ അവസാനിപ്പിക്കുകയായിരുന്നു.

എന്നാല്‍ പിന്നീട് മെസ്സി, കാന്റെ എന്നിവരടക്കമുള്ള താരങ്ങളുടെ അപേക്ഷയെ തുടര്‍ന്ന് തിരച്ചില്‍ വീണ്ടും തുടരുകയായിരുന്നു. യു.കെയുടെ വ്യോമയാന അപകട അന്വേഷണ സംഘമായിരുന്നു തിരച്ചില്‍ നടത്തിയിരുന്നത്. രണ്ട് ദിവസം മുമ്പ് തന്നെ അണ്ടര്‍ വാട്ടര്‍ ഫിലിമിങ് സംവിധാനമുപയോഗിച്ച് കടലിന്റെ അടിയില്‍ വിമാനത്തിന്റെ സ്ഥാനം കണ്ടെത്തിയിരുന്നു. ഇവിടെ നിന്ന് എടുത്ത വിഡിയോയിലും ഫോട്ടോയിലുമാണ് സലയുടെ മൃതദേഹം കണ്ടത്.