ജിദ്ദ: സി.പി.എമ്മില്‍നിന്ന് രാജിവെച്ചു മുസ്‌ലിം ലീഗില്‍ ചേര്‍ന്ന് പ്രവര്‍ത്തിക്കാന്‍ തീരുമാനിച്ച കോഴിക്കോട് എലത്തൂര്‍ സ്വദേശി അസ്‌ലം പാലത്ത്, മലപ്പുറം അരീക്കോട് സ്വദേശികളായ ഷാജഹാന്‍ കെ.പി, അലി കെ.ടി, അബ്ദുലത്തീഫ് അരീക്കോട് എന്നിവര്‍ക്ക് റിയാദ് കെ.എം.സി.സി സെന്‍ട്രല്‍ കമ്മിറ്റി സ്വീകരണം നല്‍കി.
അപ്പോളോ ഡിമോറ ഓഡിറ്റോറിയത്തില്‍ നടന്ന പരിപാടിയില്‍ സെന്‍ട്രല്‍ കമ്മിറ്റി പ്രസിഡന്റ് സി.പി. മുസ്തഫ ഇവര്‍ക്ക് കെ.എം.സി.സി അംഗത്വം നല്‍കി. കരിപ്പൂര്‍ വിമാനത്താവളത്തോട് പിണറായി സര്‍ക്കാര്‍ പുലര്‍ത്തി വരുന്ന ചിറ്റമ്മ നയം അങ്ങേയറ്റം പ്രതിഷേധാര്‍ഹമാണെന്ന് അസ്‌ലം പാലത്ത് പറഞ്ഞു.

കണ്ണൂര്‍ വിമാനത്താവളത്തിന് വേണ്ടി കരിപ്പൂരിനെ ബലികൊടുക്കുകയാണ് സര്‍ക്കാര്‍ ചെയ്യുന്നത്. നിരന്തരമായ സമര പരിപടികള്‍ക്കൊടുവിലാണ് കരിപ്പൂരിന് ശാപമോക്ഷം ലഭിച്ചത്. ഇന്ധന നികുതിയിലൂടെ കരിപ്പൂരിനെ പൂര്‍ണമായും നശിപ്പിക്കാനാണ് സര്‍ക്കാര്‍ ശ്രമിക്കുന്നത്.
കെ.എം.സി.സി സഊദി നാഷണല്‍ കമ്മിറ്റി സെക്രട്ടറിയേറ്റ് അംഗങ്ങളായ എസ്.വി അര്‍ശുല്‍ അഹമ്മദ്, കെ.കെ കോയാമു ഹാജി, ഡോ. മുഹമ്മദ് ഹനീഫ്, സത്താര്‍ താമരത്ത്, റസാഖ് വളക്കൈ, അക്ബര്‍ വേങ്ങാട്ട് ആശംസകള്‍ നേര്‍ന്നു. കെ.ടി അബുബക്കര്‍, ഉസ്മാനലി പാലത്തിങ്ങല്‍, മാമുക്കോയ ഒറ്റപ്പാലം, അബ്ദുസലാം കാളരാന്തിരി, കബീര്‍ വൈലത്തൂര്‍, അഷ്‌റഫ് അച്ചൂര്‍, ജബ്ബാര്‍ എലത്തൂര്‍ എന്നിവര്‍ ഹാരാര്‍പ്പണം നടത്തി. ജലീല്‍ തിരൂര്‍ സ്വാഗതവും ഷംസു പെരുമ്ബട്ട നന്ദിയും പറഞ്ഞു.