മുക്കം: നഗരസഭ ജനുവരി ഒന്ന് മുതല്‍ നടപ്പിലാക്കിയ പ്ലാസ്റ്റിക് നിയന്ത്രണം കൂടുതല്‍ കര്‍നമാക്കുന്നു.
ഇതിന്റെ ഭാഗമായി പൊതു സ്ഥലങ്ങളില്‍ പ്ലാസ്റ്റിക് കൂട്ടിയിടുന്നവര്‍ക്കും വലിച്ചെറിയുന്നവര്‍ക്കും കത്തിക്കുന്നവര്‍ക്കുമെതിരേ കനത്ത പിഴശിക്ഷയാണ് ഈടാക്കുന്നത്. 10,000 രൂപ മുതല്‍ 25,000 രൂപ വരെയാണ് പിഴ ചുമത്തുന്നത്. ഇത്തരം സംഭവങ്ങള്‍ ശ്രദ്ധയില്‍പെട്ടാല്‍ അത് ഫോട്ടോയെടുത്ത് നഗരസഭ സെക്രട്ടറി, ചെയര്‍മാന്‍ എന്നിവരുടെ വാട്‌സ് ആപ്പിലേക്ക് അയച്ചാല്‍ 1001 രൂപ പാരിതോഷികം നല്‍കുമെന്ന് നഗരസഭ ചെയര്‍മാന്‍ വി. കുഞ്ഞന്‍ അറിയിച്ചു. 17 പേര്‍ക്ക് ഇതിനോടകം പാരിതോഷികം നല്‍കിക്കഴിഞ്ഞു. പ്ലാസ്റ്റിക് നിയന്ത്രണ പരിപാടികള്‍ക്ക് നഗരസഭ സാധ്യമായ എല്ലാ അധികാരവും ഉപയോഗപ്പെടുത്തുമെന്നും പല ഭാഗത്ത് നിന്നുള്ള എതിര്‍പ്പുകള്‍ വകവെക്കാതെയാണ് നഗരസഭയുടെ നടപടിയെന്നും ചെയര്‍മാന്‍ വ്യക്തമാക്കി. പ്ലാസ്റ്റിക് നിയന്ത്രണ പദ്ധതികള്‍ക്കായി 2.79 കോടി രൂപയുടെ കേന്ദ്ര സര്‍ക്കാര്‍ സഹായത്തോടെയുള്ള പദ്ധതിക്കും അംഗീകാരം ലഭിച്ചിട്ടുണ്ട്.