കോഴിക്കോട്: കണ്ണൂരിലെ ദലിത് പെണ്‍കുട്ടികളെ കള്ളക്കേസില്‍ കുടുക്കി ജയിലിലടച്ചതു ജനാധിപത്യ കേരളത്തിന് അപമാനമാണെന്നു മുസ്‌ലിംലീഗ് സംസ്ഥാന ജനറല്‍ സെക്രട്ടറി കെ.പി.എ മജീദ്. പൊലിസിനെ പാര്‍ട്ടിയുടെ ചട്ടുകമാക്കി സെല്‍ഭരണം തിരിച്ചുകൊണ്ടുവരാനുള്ള സി.പി.എമ്മിന്റെ ശ്രമമാണ് പുറത്തായതെന്നും അദ്ദേഹം പറഞ്ഞു.
ദലിതുകളായ രണ്ടു യുവതികളെ പരസ്യമായി അപമാനിക്കാന്‍ ശ്രമിച്ച സി.പി.എം നേതാവിനെതിരേ പ്രതികരിച്ചതാണ് അവര്‍ക്കെതിരായ കുറ്റം. തദ്ദേശ തെരഞ്ഞെടുപ്പില്‍ ഇടതുമുന്നണിക്കെതിരേ പിതാവ് മത്സരിച്ചതിന്റെ പകപോക്കാന്‍ ഇവരെ നിരന്തരം വേട്ടയാടുകയായിരുന്നു. സുപ്രിംകോടതി മാര്‍ഗനിര്‍ദേശംപോലും കാറ്റില്‍പറത്തി സ്റ്റേഷനിലേക്കു വിളിച്ചുവരുത്തിയാണ് പിണറായിയുടെ പൊലിസ് ഇവരെ അറസ്റ്റ് ചെയ്തത്.
രാജ്യത്ത് കേട്ടുകേള്‍വിയില്ലാത്ത രീതിയില്‍ ഒന്നരവയസായ മകനെപ്പോലും യുവതികള്‍ക്കൊപ്പം ജയിലിലടക്കുന്ന സ്ഥിതിയുണ്ടായി. സ്ത്രീ സുരക്ഷയെക്കുറിച്ചും ദലിത് സംരക്ഷണത്തെപ്പറ്റിയും വാചാലമാവുന്ന മലയാളികളുടെ മുഖത്തേറ്റ പ്രഹരമാണ് ഈ സംഭവം. യുവതികളെ അപമാനിച്ചവര്‍ക്കെതിരേ കര്‍ശന നടപടിയെടുക്കാന്‍ ബന്ധപ്പെട്ടവര്‍ തയാറാകണമെന്നും അദ്ദേഹം ആവശ്യപ്പെട്ടു.