തിരുവനന്തപുരം: കൊവിഡ്-19 പ്രതിരോധ നടപടികളും മുന്നൊരുക്കങ്ങളും സംബന്ധിച്ച് മുഖ്യമന്ത്രി പിണറായി വിജയന്‍ പ്രധാനമന്ത്രി നരേന്ദ്രമോദിയുമായി വിഡിയോ കോണ്‍ഫറന്‍സ് നടത്തി. സംസ്ഥാനത്തിന്റെ കൊവിഡ്-19 പാക്കേജിനെപ്പറ്റിയും പ്രതിരോധ-മുന്നൊരുക്ക നടപടികളെപ്പറ്റിയും പ്രധാനമന്ത്രിയെ ധരിപ്പിച്ചെന്ന് മുഖ്യമന്ത്രി പറഞ്ഞു. ഗ്രാമീണ തൊഴിലുറപ്പ് പദ്ധതിക്കായി 100 ദിവസത്തെ തൊഴില്‍ദിനങ്ങള്‍ 150 ദിവസങ്ങളായും വേതനം അന്‍പത് രൂപയെങ്കലും വര്‍ധിപ്പിക്കണമെന്നും മുഖ്യമന്ത്രി ആവശ്യപ്പെട്ടു. സംസ്ഥാനത്തിന് വായ്പാപരിധി ഉയര്‍ത്തണം. വയോജനങ്ങള്‍ക്കും ദരിദ്രര്‍ക്കും അസംഘടിത മേഖലയിലുള്ളവര്‍ക്കുമുള്ള വരുമാനം വര്‍ധിപ്പിക്കാനുള്ള പദ്ധതികള്‍ക്ക് രൂപം നല്‍കണം. ആവശ്യത്തിനുള്ള ഭക്ഷ്യധാന്യങ്ങളുടെ ലഭ്യത സബ്‌സിഡി നിരക്കില്‍ ഉറപ്പാക്കണം. അവശ്യ സാധനങ്ങള്‍ തടസമില്ലാതെ എത്തിക്കാനുള്ള സംവിധാനവും ഉറപ്പുവരുത്തണം. ചെറുകിട സൂക്ഷ്മ വായ്പകള്‍ കുറഞ്ഞ പലിശനിരക്കില്‍ നല്‍കാന്‍ ബാങ്കുകള്‍ക്ക് നിര്‍ദേശം നല്‍കണമെന്നും കൂടുതല്‍ പരിശോധനാ ലബോറട്ടറികള്‍ക്കുള്ള അനുവാദം നല്‍കണമെന്നും പ്രധാനമന്ത്രിയോട് മുഖ്യമന്ത്രി ആവശ്യപ്പെട്ടു.