കട്ടപ്പന: ഹൈറേഞ്ചില്‍ വൈദ്യുതി മുടക്കം പതിവാകുന്നു. രാത്രിയെന്നോ പകലെന്നോ വ്യത്യാസമില്ലാതെ വൈദ്യുതി തടസം ഉണ്ടാകുന്നതിനാല്‍ ജീവിതം താറുമാറാകുകയാണ്. ഒരാഴ്ചയോളമായി വൈദ്യുതി മുടങ്ങുന്നതിന് അധികൃതര്‍ നല്‍കുന്ന വിശദീകരണം അറ്റകുറ്റപ്പണികള്‍ നടക്കുന്നു എന്നതാണ്. രണ്ടു ദിവസമായി പകല്‍ സമയങ്ങളില്‍ പൂര്‍ണമായും വൈദ്യുതി മുടങ്ങി. 66 കെവിയില്‍ ടച്ച് നീക്കം ചെയ്യുന്ന ജോലികള്‍ നടക്കുന്നതിനാലാണ് വൈദ്യുതി മുടങ്ങുന്നതെന്നാണ് കെ.എസ്.ഇ.ബി യുടെ വിശദീകരണം. വൈദ്യുതി മുടക്കം പതിവായതോടെ കാര്‍ഷിക, നിര്‍മാണ മേഖലകള്‍ പ്രതിസന്ധിയിലാണ്. തൂക്കുപാലം, നെടുങ്കണ്ടം സെക്ഷനുകള്‍ക്കു കീഴിലുള്ള പ്രദേശങ്ങളാണ് കഴിഞ്ഞ ദിവസങ്ങളില്‍ ഇരുട്ടിലായത്. കല്ലാര്‍, തുക്കുപാലം സെക്ഷനുകളുടെ കീഴില്‍ ഗ്രാമങ്ങളിലാണ് കൂടുതല്‍ കണക്ഷനുകള്‍. ഗ്രാമങ്ങളില്‍ വൈദ്യുതി ലൈനുകള്‍ കടന്നുപോകുന്നത് പലയിടത്തും മരങ്ങള്‍ക്കിടയിലൂടെയാണ്. ചെറിയ മരക്കമ്പ് തട്ടിയാല്‍പോലും വൈദ്യുതി വിച്ഛേദിക്കപ്പെടും. മേഖലയില്‍ ഇന്നലെ രാവിലെമുതല്‍ വൈദ്യുതി മുടങ്ങിയിരുന്നു. വൈകുന്നേരമാണ് വൈദ്യുതി പുനഃസ്ഥാപിച്ചത്. ഇതോടെ മേഖലയിലെ ആയിരക്കണക്കിന് വ്യാപാരികളും ജനങ്ങളും ദുരിതത്തിലായി. കൃത്യസമയങ്ങളില്‍ ടച്ചുവെട്ടാന്‍ അധികൃതര്‍ നടപടി സ്വീകരിക്കാത്തതാണ് നാട്ടുകാര്‍ക്കു ബുദ്ധിമുട്ടാകുന്നത്. വീട്ടാവശ്യങ്ങള്‍ക്കും കൃഷിക്കുമായി ധാരാളം ജലം ആവശ്യമുണ്ടെങ്കിലും പകല്‍സമയങ്ങളില്‍ വോള്‍ട്ടേജ് ഇല്ലാത്തതുമൂലം മോട്ടോര്‍ പ്രവര്‍ത്തിപ്പിക്കാനാകുന്നില്ല. അര്‍ധരാത്രിയിലാണ് മോട്ടോര്‍ പ്രവര്‍ത്തിപ്പിക്കാനുള്ള വോള്‍ട്ടേജ് ലഭിക്കുന്നത്. ഹൈറേഞ്ചില്‍ പലയിടത്തും കണക്ഷനുകള്‍ക്ക് ആനുപാതികമായി ട്രാന്‍സ്‌ഫോര്‍മറുകള്‍ സ്ഥാപിച്ചിട്ടില്ല. ഓവര്‍ലോഡുമൂലം പീക് ടൈമില്‍ ഡ്രിപ് ആവുന്നതും നിത്യസംഭവമാണ്. ആവശ്യത്തിന് ട്രാന്‍സ്‌ഫോര്‍മറുകള്‍ സ്ഥാപിച്ച് വോള്‍ട്ടേജ് പ്രതിസന്ധി പരിഹരിക്കണമെന്ന് വര്‍ഷങ്ങളായി ജനങ്ങള്‍ ആവശ്യപ്പെടുന്നതാണ്. ഉള്‍ഗ്രാമങ്ങളിലെ ഏലത്തോട്ടങ്ങളിലടക്കം വൈദ്യുതിമുടക്കം ജലസേചനത്തെ കാര്യമായി ബാധിക്കുകയാണ്.