ആലപ്പുഴ: മാവേലിക്കര സ്‌പെഷല്‍ സബ് ജയിലില്‍  എം. ജെ ജേക്കബ് എന്ന വിചാരണ തടവുകാരന്‍ മരിച്ച സംഭവത്തെക്കുറിച്ച്  പ്രത്യേക അന്വേഷണ സംഘം രൂപീകരിച്ച് വിശദമായ അന്വേഷണം നടത്തണമെന്ന് സംസ്ഥാന മനുഷ്യാവകാശ കമ്മിഷന്‍. മരണം കസ്റ്റഡിയില്‍  നടന്ന കൊലപാതകമാണെന്ന് സംശയിക്കാവുന്ന സാഹചര്യമുണ്ടെന്ന് കമ്മിഷന്‍ വിലയിരുത്തി.  

അന്വേഷണത്തില്‍ ഉദ്യോഗസ്ഥ തലത്തില്‍ വീഴ്ച കണ്ടെത്തിയാല്‍ ഉത്തരവാദികളുടെ പേരില്‍ വകുപ്പുതല നടപടികള്‍ സ്വീകരിക്കണമെന്നും കമ്മിഷന്‍ ജുഡിഷ്യല്‍ അംഗം പി.മോഹനദാസ് ആവശ്യപ്പെട്ടു.  സംസ്ഥാന പൊലിസ് മേധാവിക്കാണ് ഉത്തരവ്  നല്‍കിയത്. 

 ഇന്‍ഷുറന്‍സ് തുക തട്ടിപ്പുകേസില്‍ പ്രതിയായ എം.ജെ ജേക്കബ് മാവേലിക്കര സബ് ജയിലില്‍ ജുഡിഷ്യല്‍ കസ്റ്റഡിയിലിരിക്കെ ദുരൂഹ സാഹചര്യത്തില്‍ മരിച്ച സംഭവത്തില്‍ മനുഷ്യാവകാശ കമ്മിഷന്‍ സ്വമേധയാ രജിസ്റ്റര്‍ ചെയ്ത കേസിലാണ് ഉത്തരവ്. 2019 മാര്‍ച്ച് 21 നാണ് സംഭവം. 

പരാതിയുടെ ഗൗരവം കണക്കിലെടുത്ത് കമ്മിഷന്റെ അന്വേഷണ വിഭാഗം  നേരിട്ട് അന്വേഷണം നടത്തിയിരുന്നു. മജിസ്റ്റീരിയല്‍ റിപ്പോര്‍ട്ടില്‍ കൊലപാതകത്തിനുള്ള സാധ്യത ചൂണ്ടിക്കാണിച്ചിട്ടും സംശയകരമായ വസ്തുതകളെക്കുറിച്ച് ഫല പ്രദമായ അന്വേഷണം നടക്കുന്നില്ലെന്ന് കമ്മിഷന്‍ കണ്ടെത്തി.  

 ജേക്കബ് സ്വയം  തൂവാല വിഴുങ്ങി മരിച്ചെന്നാണ് പൊലിസിന്റെ കണ്ടെത്തല്‍. ഇത് ജുഡീഷ്യല്‍ എന്‍ക്വയറി റിപ്പോര്‍ട്ടില്‍ തള്ളിക്കളഞ്ഞിട്ടുണ്ട്. ദുരൂഹ മരണത്തെക്കുറിച്ചുള്ള അന്വേഷണം  ആലപ്പുഴ ക്രൈംബ്രാഞ്ചിന് സംസ്ഥാന പൊലിസ് മേധാവി കൈമാറിയിട്ടുണ്ട്.