റിയാദ്: സഊദിയില്‍ നടന്ന ഫാല്‍ക്കണ്‍ ഫെസ്റ്റിവെല്‍ ഗിന്നസ് റെക്കോഡില്‍ കയറി. സഊദി കിങ് അബ്ദുല്‍ അസീസ് ഫാല്‍ക്കണ്‍ ഫെസ്റ്റിവലാണ് ഗിന്നസ് ബുക്കില്‍ എത്തിയത്. ഇക്കഴിഞ്ഞ ജനുവരി 25 നു ആരംഭിച്ചു ഫെബ്രുവരി 3 നു അവസാനിച്ച പത്തു ദിവസത്തെ ഫെസ്റ്റിവെലില്‍ 1,723 ഫാല്‍ക്കണ്‍ പക്ഷികളാണ് മാറ്റുരച്ചത്. സഊദി ഫാല്‍ക്കണ്‍ ക്ലബ്ബ് സംഘടിപ്പിച്ച മത്സരത്തില്‍ നിരവധി പേരാണ് സാക്ഷികളായത്.

ഗിന്നസ് റെക്കോഡില്‍ കയറിയ ഫാല്‍ക്കണ്‍ ഫെസ്റ്റിവെലിനുള്ള ഗിന്നസ് അവാര്‍ഡ് ഗിന്നസ് പ്രതിനിധി ഷിദ സുബാസി ജമീസിയില്‍ നിന്നും സഊദി ഫാല്‍ക്കണ്‍ ക്ലബ്ബ് എക്‌സിക്യുട്ടീവ് ഡയറക്ടര്‍ ഹൊസ്സാം ബിന്‍ അബ്ദുല്‍ മുഹ്‌സിന്‍ ഏറ്റുവാങ്ങി.

സഊദിക്ക് പുറമെ, ജി.സി.സിയില്‍ നിന്നും വിവിധ ലോക രാജ്യങ്ങളില്‍ നിന്നും പങ്കെടുത്ത ഫാല്‍ക്കണ്‍ മത്സരത്തിന് സമ്മാനമായി നല്‍കിയത് 17,630,000 റിയാല്‍ (33,67,38,999 രൂപ) മൂല്യമുള്ള സമ്മാനമാണ്. അന്താരാഷ്ട്ര മാദണ്ഡങ്ങള്‍ അനുസരിച്ചു പൂര്‍ത്തിയാക്കിയ പരിപാടിയായിരുന്നുവെന്നു ഗിന്നസ് പ്രതിനിധി പറഞ്ഞു. ഫാല്‍ക്കണ്‍ മത്സരത്തിലെ ആദ്യ മൂന്നു സ്ഥാനക്കാര്‍ക്ക് 500,000/200,000/100,000 റിയാല്‍ എന്നിങ്ങനെയാണ് സമ്മാനമായി നല്‍കിയത്.