മോസ്‌കോ: കൊവിഡ് രോഗബാധയുണ്ടാക്കുന്ന നോവല്‍ കൊറോണ വൈറസിന്റെ ജനതി ഘടന പൂര്‍ണമായും ഡീകോഡ് ചെയ്‌തെടുത്തതായി റഷ്യന്‍ ശാസ്ത്രജ്ഞര്‍. സ്‌മോറോഡിന്‍സ്‌റ്റേവ് റിസര്‍ച്ച് ഇന്‍സ്റ്റിറ്റ്യൂട്ട് ഓഫ് ഇന്‍ഫ്‌ളൂവന്‍സയിലെ ശാസ്ത്രജ്ഞരാണ് നിര്‍ണായക നേട്ടം സാധ്യമാക്കിയത്. വൈറസിന്റെ ചിത്രങ്ങളും ഇവര്‍ പുറത്തുവിട്ടു.

ഇത് ലോകാരോഗ്യ സംഘടനയുടെ ഡാറ്റാ ബേസിലേക്ക് കൈമാറിയിട്ടുണ്ടെന്നും റഷ്യന്‍ ആരോഗ്യമന്ത്രാലയം പ്രസ്താവനയില്‍ പറഞ്ഞു.

കൊവിഡ് 19 രോഗിയില്‍ നിന്നെടുത്ത സാമ്പിള്‍ ഉപയോഗിച്ചാണ് വൈറസിന്റെ പൂര്‍ണമായ ജനിതഘടന ആദ്യമായി കണ്ടെത്തിയത്. കൊറോണ വൈറസിന്റെ ജനിതക പഠനം ഇതിന്റെ പരിണാമം, സ്വഭാവം എന്നിവ മനസിലാക്കുന്നതിനു സഹായിക്കുമെന്നും ഗവേഷകര്‍ പറഞ്ഞു. പ്രതിരോധ മരുന്നുകള്‍ വികസിപ്പിക്കാന്‍ ഇതു സഹായിക്കുമെന്നും റിസര്‍ച്ച് ഇന്‍സ്റ്റിറ്റ്യൂട്ട് തലവന്‍ ദിമിത്രി ലിയോസ്‌നോവ് പ്രതികരിച്ചു.

നോവോസിബിര്‍സ്‌കിലെ സ്റ്റേറ്റ് റിസര്‍ച്ച് സെന്റര്‍ ഓഫ് വൈറോളജി ആന്‍ഡ് ബയോടെക്നോളജി (വെക്ടര്‍)യിലെ ഗവേഷകരാണ് വൈറസിന്റെ സൂക്ഷ്മചിത്രം പകര്‍ത്തിയിരിക്കുന്നത്.