വെല്ലിങ്ടണ്‍: ഏകദിന പരമ്പരക്ക് പിന്നാലെ ടി20യും കൈപ്പിടിയിലാക്കാന്‍ രോഹിത് ശര്‍മക്ക് കീഴില്‍ ഇന്ത്യ ഇന്നിറങ്ങും. ന്യൂസിലന്‍ഡിനെതിരേയുള്ള ടി20 പരമ്പരയിലെ ആദ്യ മത്സരത്തിനാണ് ഇന്ന് വെല്ലിങ്ടണിലെ വെസ്റ്റ്പാക് സ്റ്റേഡിയം സാക്ഷ്യം വഹിക്കുന്നത്. മൂന്ന് മത്സരങ്ങളടങ്ങിയതാണ് പരമ്പര. ന്യൂസിലന്‍ഡിലെ മണ്ണില്‍ ഇതുവരെ ടി20 ജയിക്കാന്‍ കഴിഞ്ഞിട്ടില്ലെന്ന പേരുദോഷം മാറ്റാനാണ് ഇന്ത്യയുടെ ശ്രമം. പക്ഷേ ഏകദിന പരമ്പരയില്‍ 4-1ന് ഇന്ത്യക്ക് മുന്നില്‍ തകര്‍ന്നടിഞ്ഞ നൂസിലന്‍ഡ് ടി20യില്‍ മറുപടി നല്‍കാനുറച്ചാണ് ഇറങ്ങുന്നത്. 2009ല്‍ ന്യൂസിലന്‍ഡില്‍ അവസാനമായി ടി20 കളിച്ചപ്പോള്‍ ഇന്ത്യ 2-0ത്തിന് പരാജയപ്പെട്ടിരുന്നു. ലോകകപ്പ് അടുത്തു നില്‍ക്കെ ഇന്ത്യന്‍ താരങ്ങള്‍ക്ക് മികവ് കാട്ടാനുള്ള അവസരം കൂടിയാണ് ഈ ടി20 പരമ്പര. വിശ്രമം അനുവദിച്ച കോഹ്‌ലിക്ക് പകരം രോഹിത് ശര്‍മയാണ് ഇന്ത്യയെ നയിക്കുന്നത്. കാത്തിരിപ്പിന് ശേഷം ധോണി ടി20 ടീമില്‍ തിരിച്ചെത്തിയതും ഇന്ത്യന്‍ മധ്യനിരക്ക് ആശ്വാസം പകരുന്നു. ആസ്‌ത്രേലിയന്‍ പര്യടനത്തിലും വെസ്റ്റ് ഇന്‍ഡീസ് പര്യടനത്തിലും ധോണി ടി20 ടീമില്‍ ഇടംപിടിച്ചിരുന്നില്ല. ആസ്‌ത്രേലിയന്‍ പര്യടനത്തില്‍ മികച്ച പ്രകടനം നടത്തിയ ഋഷഭ് പന്തും ധോണിക്ക് പകരക്കാരനായി ടീമിലുണ്ട്.
ആദ്യ മത്സരത്തില്‍ പന്തിനെ പ്ലെയിങ് ഇലവനില്‍ ഉള്‍പ്പെടുത്തിയേക്കും. ബാറ്റ്‌സ്മാനായി മാത്രം പന്തിനെ കളിപ്പിക്കാനാണ് സാധ്യത. ഓള്‍റൗണ്ടര്‍ ഹര്‍ദിക് പാണ്ഡ്യക്കൊപ്പം സഹോദരനും മറ്റൊരു ഓള്‍റൗണ്ടറുമായ ക്രുനാല്‍ പാണ്ഡ്യയും ഇന്ത്യക്കായി കളിച്ചേക്കും. എന്നാല്‍ ഏകദിന പരമ്പരയില്‍ പ്ലെയര്‍ ഓഫ് ദി സീരീസായിരുന്ന പേസര്‍ മുഹമ്മദ് ഷമി ടി20 പരമ്പരയില്‍ ഇല്ലെന്നത് ഇന്ത്യന്‍ ബൗളിങിന്റെ മൂര്‍ച്ച കുറച്ചേക്കും. ഭുവനേശ്വര്‍ കുമാറിനൊപ്പം ഖലീല്‍ അഹമ്മദ് പേസ് ബൗളിങിന് ചുക്കാന്‍ പിടിക്കുമെന്നാണ് സൂചന. ഏകദിന പരമ്പരയില്‍ അവസരം മുതലെടുക്കാന്‍ കഴിയാതെ പോയെങ്കിലും ശുഭ്മാന്‍ ഗില്ലും ടീമിലിടം പിടിച്ചിട്ടുണ്ട്.
ന്യൂസിലന്‍ഡിന് മുന്‍തൂക്കം

ടി20യിലെ ഇതുവരെയുള്ള കണക്കുകള്‍ പരിശോധിച്ചാല്‍ ഇന്ത്യക്കെതിരേ ന്യൂസിലന്‍ഡിനു വ്യക്തമായ മുന്‍തൂക്കമുണ്ട്. ഇതുവരെ എട്ടു ടി20കളില്‍ ഇരുടീമും മുഖാമുഖം വന്നപ്പോള്‍ ആറിലും ജയം കിവീസിനായിരുന്നു. രണ്ടു മത്സരങ്ങള്‍ മാത്രമാണ് ഇന്ത്യക്കു ജയിക്കാനായത്. എന്നാല്‍ ന്യൂസിലന്‍ഡില്‍ ഇന്ത്യ രണ്ടു ടി20 മത്സരങ്ങളില്‍ മാത്രമേ കളിച്ചിട്ടുള്ളൂ. ഇവ രണ്ടിലും ഇന്ത്യ പരാജയപ്പെട്ടു. വെല്ലിങ്ടണിലായിരുന്നു ഒരു ടി20 നടന്നത്. അന്ന് അഞ്ചു വിക്കറ്റിനായിരുന്നു കിവീസിന്റെ ജയം.