തിരുവനന്തപുരം: ആരോഗ്യവകുപ്പിന്റെ 'ഹൃദ്യം'പദ്ധതിയുടെ വെബ്‌സൈറ്റിന്റെ പ്രവര്‍ത്തനം മരവിപ്പിച്ചു.
പദ്ധതിയില്‍ രജിസ്റ്റര്‍ ചെയ്ത 3,800 പേരുടെ വ്യക്തി വിവരങ്ങളും രോഗവിവരങ്ങളും ചോര്‍ന്നെന്ന സംശയത്തെ തുടര്‍ന്നാണ് വെബ്‌സൈറ്റ് പ്രവര്‍ത്തനം മരവിപ്പിച്ചത്. കൂടാതെ സംഭവത്തെക്കുറിച്ച് അന്വേഷിക്കാന്‍ നിര്‍ദേശം നല്‍കിയതായി ആരോഗ്യ മന്ത്രി കെ.കെ ശൈലജ അറിയിച്ചു. ആദ്യം പദ്ധതിയില്‍ രജിസ്റ്റര്‍ ചെയ്യാനുള്ള സൗകര്യം ഒഴിവാക്കിയ സൈറ്റിന്റെ പ്രവര്‍ത്തനം പിന്നീട് പൂര്‍ണമായും മരവിപ്പിക്കുകയായിരുന്നു. വിവരങ്ങള്‍ ചോര്‍ന്നതായി ഫ്രഞ്ച് സൈബര്‍ സുരക്ഷാ വിദഗ്ധനായ എലിയറ്റ് ആല്‍ഡേഴ്‌സനാണ് ട്വീറ്റിലൂടെ മുഖ്യമന്ത്രിയുടെ ശ്രദ്ധയില്‍പ്പെടുത്തിയത്.

സൈറ്റ് ഹാക്ക് ചെയ്തുവെന്ന് ആരോപിച്ച് ഇദ്ദേഹത്തിനെതിരേ പൊലിസ് കേസ് രജിസ്റ്റര്‍ ചെയ്യാന്‍ നടപടി തുടങ്ങിയെങ്കിലും വിവരം കൈമാറിയ ഒരാളുടെ പേരില്‍ നടപടി സ്വീകരിക്കരുതെന്ന് മുഖ്യമന്ത്രി നിര്‍ദേശം നല്‍കിയതിനെ തുടര്‍ന്ന് പൊലിസ് പിന്മാറുകയായിരുന്നു. എന്നാല്‍ സുരക്ഷാ മാനദണ്ഡം പാലിക്കാതെ വെബ്‌സൈറ്റ് ഡിസൈന്‍ ചെയ്യുകയും അത് പരിശോധനയ്ക്ക് വിധേയമാക്കാത്ത ആരോഗ്യ വകുപ്പ് ഉദ്യോഗസ്ഥര്‍ക്കെതിരേ നടപടി സ്വീകരിക്കാനും തയാറായിട്ടില്ല.
അതേ സമയം, രോഗികളുടെ വിവരം സൂക്ഷിക്കുന്ന ആരോഗ്യ വകുപ്പിന്റെ വെബ്‌സൈറ്റ് സുരക്ഷാ പരിശോധനയ്ക്ക് വിധേയമാക്കാനും മന്ത്രി ശൈലജ ആരോഗ്യ വകുപ്പ് സെക്രട്ടറിക്ക് നിര്‍ദേശം നല്‍കിയിട്ടുണ്ട്.