ഹരാരെ: സിംബാബ്‌വെക്കെതിരായ ടി20 പരമ്പരയിലെ ആദ്യ മത്സരത്തില്‍ ഇന്ത്യയ്ക്ക് രണ്ടു റണ്‍സിന്റെ ഞെട്ടിപ്പിക്കുന്ന തോല്‍വി. സിംബാബ്‌വെയുടെ 171 റണ്‍സ് വിജയ ലക്ഷ്യം പിന്തുടര്‍ന്ന ഇന്ത്യ 168 റണ്‍സില്‍ ഒതുങ്ങുകയായിരുന്നു. ജയത്തോടെ മൂന്നു മത്സരങ്ങളുടെ പരമ്പരയില്‍ 1-0ന് മുന്നിലെത്താന്‍ ആതിഥേയര്‍ക്ക് സാധിച്ചു.
സ്‌കോര്‍ പിന്തുടര്‍ന്ന ഇന്ത്യ യ്ക്ക് മോശം തുടക്കമാണ് ലഭിച്ചത്. ലോകേഷ് രാഹുല്‍(0) ആദ്യ പന്തില്‍ തന്നെ പുറത്തായി. മന്‍ദീപ് സിങ് (31) അമ്പാട്ടി റായിഡു(19) എന്നിവര്‍ പൊരുതിയെങ്കിലും അധികം മുന്നോട്ടു പോകാന്‍ സാധിച്ചില്ല.
മനീഷ് പാണ്ഡെ (48) കേദാര്‍ ജാദവ് (19) സഖ്യം ഇന്ത്യയുടെ പോരാട്ടത്തെ മുന്നോട്ടു നയിച്ചു. എന്നാല്‍ നായകന്‍ മഹേന്ദ്രസിങ് ധോണിക്ക് (19*) പ്രതീക്ഷിച്ച രീതിയില്‍ സ്‌കോര്‍ ഉയര്‍ത്താനായില്ല. ധോണിയുടെ തപ്പിതടഞ്ഞുള്ള ഇന്നിങ്‌സാണ് ഇന്ത്യയെ തോല്‍വിയിലേക്ക് നയിച്ചത്. അക്‌സര്‍ പട്ടേല്‍ (18*) കത്തിക്കയറിയെങ്കിലും വിജയത്തിലെത്തിക്കാനായില്ല. സിംബാബ്‌വെക്ക് വേണ്ടി മുസാരാബാനി, ചിബാബ എന്നിവര്‍ രണ്ടു വിക്കറ്റെടുത്തു.
നേരത്തെ എല്‍ട്ടന്‍ ചിംഗുംബുര(26 പന്തില്‍ 56*)യുടെ ഇന്നിങ്‌സാണ് സിംബാബ്‌വെക്ക് മികച്ച സ്‌കോര്‍ സമ്മാനിച്ചത്. നാലിന് 98 എന്ന നിലയിലേക്ക് വീണ ടീമിനെ ചിംഗുംബുര ഒറ്റയ്ക്കാണ് നയിച്ചത്. ഏഴു സിക്‌സറും ഒരു ബൗണ്ടറിയും താരത്തിന്റെ ഇന്നിങ്‌സിലുണ്ടായിരുന്നു.