കോഴിക്കോട്: കൊവിഡ് ഭീതിക്കിടെ കടുത്ത വേനലില്‍ ചെറുമഴകള്‍. തൃശൂര്‍, എറണാകുളം, ആലപ്പുഴ കോട്ടയം, പത്തനംതിട്ട,ഇടുക്കി ജില്ലകളിലാണ് മഴയ്ക്ക് സാധ്യത.
കൊല്ലം , തിരുവനന്തപുരം ജില്ലകളിലും ഒന്നോ രണ്ടോ പ്രദേശങ്ങളില്‍ മഴ ലഭിച്ചേക്കാമെന്ന് കാലാവസ്ഥാ നിരീക്ഷണ കേന്ദ്രം പറയുന്നു. പാലക്കാട് ജില്ല തൃശൂര്‍ ജില്ലയുമായി അതിര്‍ത്തി പങ്കിടുന്ന പ്രദേശങ്ങളിലും മഴ സാധ്യതയുണ്ട്.
കണ്ണൂര്‍ ഒഴികെയുള്ള മറ്റു ജില്ലകളിലും മഴസാധ്യതകളുണ്ട്. തിരുവനന്തപുരം, കൊല്ലം, പത്തനംതിട്ട, ഇടുക്കി തുടങ്ങിയ ജില്ലകളില്‍ ബുധനാഴ്ച വരെ ചെറുമഴകള്‍ക്ക് സാധ്യതയുണ്ടെന്ന് തിരുവനന്തപുരം കാലാവസ്ഥാ നിരീക്ഷണ കേന്ദ്രം അറിയിച്ചു.
ആലപ്പുഴ, കോട്ടയം, എറണാകുളം തൃശൂര്‍, പാലക്കാട്, മലപ്പുറം ജില്ലകളിലും ചൊവ്വാഴ്ച വരെ ചെറുമഴകള്‍ക്ക് സാധ്യതയുണ്ടെന്നാണ് കാലാവസ്ഥാ കേന്ദ്രം അറിയിക്കുന്നത്.
കോഴിക്കോട്, വയനാട്, കണ്ണൂര്‍, കാസര്‍കോട് ഉള്‍പ്പെടുന്ന മലബാര്‍ മേഖലയില്‍ മഴക്കുറവും ഉഷ്ണം കൂടിയ അവസ്ഥയും തുടരുകയാണ്. സമുദ്രനിരപ്പില്‍നിന്നു രണ്ടായിരം മീറ്റര്‍ ഉയരത്തിലുള്ള പശ്ചിമഘട്ടമേഖലയായ വയനാട്ടിലെ മഴക്കുറവ് ഇത്തവണയും കര്‍ഷകരെ ഉള്‍പ്പെടെ പ്രയാസത്തിലാക്കിയിരിക്കയാണ്. പൊതുവേ തണുപ്പ് കാലാവസ്ഥയുള്ള വയനാട്ടില്‍ പകല്‍ സമയത്ത് ഉഷ്ണം 36 ഡിഗ്രി സെള്‍ഷ്യസ് വരെ എത്തിയിരിക്കുകയാണ്. രാത്രി താപനില 16ല്‍നിന്ന് 20 വരെയാകും.