തിരുവനന്തപുരം: കഴിഞ്ഞ നിയമസഭാ തെരഞ്ഞെടുപ്പില്‍ ഇലക്‌ട്രോണിക് വോട്ടിങ് യന്ത്രത്തില്‍ കൃത്രിമം നടത്തി മലപ്പുറത്തെ രണ്ട് മണ്ഡലങ്ങളില്‍ ഫലം അട്ടിമറിച്ചെന്ന ആരോപണത്തിന്റെ നിജസ്ഥിതി അന്വേഷിക്കുമെന്ന് മുഖ്യ തെരഞ്ഞെടുപ്പ് ഓഫിസര്‍ ടിക്കാറാം മീണ. അന്വേഷണം നടത്താന്‍ പൊലിസിന് നിര്‍ദ്ദേശം നല്‍കിയതായി ടിക്കാറാം മീണ അറിയിച്ചു. ഇന്ത്യന്‍ ശിക്ഷാനിയമം 505ാം വകുപ്പനുസരിച്ച് അന്വേഷണം നടത്തുക.

സമൂഹത്തില്‍ ആശങ്കയുണ്ടാക്കുന്നതും സമാധാനാന്തരീക്ഷം തകര്‍ക്കുന്നതുമായ സന്ദേശങ്ങള്‍ പ്രചരിപ്പിക്കുന്നതിനെതിരെയുള്ള വകുപ്പാണ് 505. മൂന്നുവര്‍ഷം തടവും പിഴയുമാണ് ശിക്ഷ.

മുസ്ഫിര്‍ കാരക്കുന്ന് എന്നയാളാണു ഫെയ്‌സ്ബുക് പോസ്റ്റ് വഴി ആരോപണം ഉന്നയിച്ചത്. 2016ലെ നിയമസഭാ തെരഞ്ഞെടുപ്പില്‍ മലപ്പുറം ജില്ലയില്‍ ഒരു കോണ്‍ഗ്രസ് സ്ഥാനാര്‍ഥിയും ഒരു മുസ്‌ലിം ലീഗ് സ്ഥാനാര്‍ഥിയും പരാജയപ്പെട്ടത് തിരുവനന്തപുരത്തെ ഐ.ടി കമ്പനിയുടെ സാങ്കേതിക സഹായത്തോടെ വോട്ടിങ് യന്ത്രത്തില്‍ കൃത്രിമം നടത്തിയതുകൊണ്ടാണെന്നായിരുന്നു ആരോപണം. തെളിവുകള്‍ തന്റെ കയ്യിലുണ്ടെന്നും തെരഞ്ഞെടുപ്പു കമ്മിഷന്‍ ആവശ്യപ്പെട്ടാല്‍ അവ നല്‍കുമെന്നും ഫെയ്‌സ്ബുക് പോസ്റ്റില്‍ സൂചിപ്പിച്ചിരുന്നു. കൃത്രിമം നടത്താന്‍ അഞ്ച് കോടി രൂപ വീതമാണ് ഓരോ സ്ഥാനാര്‍ഥിയും കമ്പനിക്കു നല്‍കിയതെന്നും ആരോപണമുണ്ട്.

അതേസമയം, ആരോപണം തെറ്റെന്നു തെളിഞ്ഞാല്‍ ഉന്നയിച്ചയാള്‍ക്കെതിരെ ശിക്ഷാനടപടിയുണ്ടാവും.

കോണ്‍ഗ്രസ്, മുസ്‌ലിം ലീഗ് സ്ഥാനാര്‍ഥികള്‍ക്കെതിരെ മലപ്പുറം ജില്ലയില്‍ മല്‍സരിച്ചു ജയിച്ചത് സി.പി.എം സ്ഥാനാര്‍ഥികളാണ്. സിപിഎമ്മിനു നാല് എം.എല്‍.എമാരാണു മലപ്പുറം ജില്ലയിലുള്ളത്.