കുറ്റിപ്പുറം: വാഹനം ഓടിക്കുന്ന ഡ്രൈവര്‍ക്ക് കാഴ്ചവൈകല്യമുണ്ടോയെന്ന് ഉറപ്പു വരുത്തുന്നതിനായി വേറിട്ട പരിശോധന സംവിധാനവുമായി മോട്ടോര്‍ വാഹന വകുപ്പിലെ മലപ്പുറം എന്‍ഫോഴ്‌സ്മന്റ് വിഭാഗം രംഗത്ത്. ദേശീയ റോഡ് സുരക്ഷ വാരത്തിന്റെ ഭാഗമായാണ് മലപ്പുറം എന്‍ഫോഴ്‌സ്‌മെന്റ് ആര്‍.ടി.ഒ ഗോകുല്‍, മലപ്പുറം ആര്‍.ടി.ഒ അനൂപ്‌വര്‍ക്കി എന്നിവരുടെ നേതൃത്വത്തില്‍ എം.വി.ഐമാരായ റജിമോന്‍, ബാലകൃഷ്ണന്‍, എ.എം.വി.ഐ ഹരിലാല്‍ കെ. രാമകൃഷ്ണന്‍ എന്നിവരാണ്് പരിശോധന നടത്തിയത്. വാഹനങ്ങള്‍ ഓടിക്കുമ്പോള്‍ ശരിയായ കാഴ്ചയില്ലാത്തതിനാല്‍ അപകടത്തിന് കാരണമാകുന്നുണ്ടെന്ന പരാതി വ്യാപകമാണ്.
ഐ.ഇ.എല്‍.ടി.സി ഇംഗ്ലീഷ് സ്‌കൂളിലാണ് പരിശോധന യൂനിറ്റ് സജ്ജമാക്കിയത്. ഹെല്‍മറ്റില്ലാതെയും സീറ്റ് ബെല്‍റ്റ് ധരിക്കാതെയും എത്തിയവര്‍ക്ക് ബോധവല്‍ക്കരണം നല്‍കി കഴ്ചപരിശോധന നടത്തിയാണ് പറഞ്ഞുവിട്ടത്. കണ്ണ് രോഗ വിദഗ്ധ വി. ലേഖ നേതൃത്വം നല്‍കി.