എടപ്പാള്‍: വിദ്യാര്‍ഥിയെ ആക്രമിച്ച് പരുക്കേല്‍പ്പിച്ച സംഭവത്തില്‍ പൊന്നാനി പൊലിസ് നാല് പേര്‍ക്കെതിരേ കേസെടുത്തു. മാണൂര്‍ മലബാര്‍ ആര്‍ട്‌സ് ആന്‍ഡ് സയന്‍സ് കോളജിലെ ബികോം ഫൈനല്‍ ഇയര്‍ വിദ്യാര്‍ഥിയായ ചങ്ങരംകുളം മാട്ടം സ്വദേശി ചാലുപറമ്പില്‍ അജ്മല്‍ (21) നെയാണ് ബൈക്കിലെത്തിയ സംഘം ആക്രമിച്ച് പരുക്കേല്‍പ്പിച്ചത്. ചൊവ്വാഴ്ച ഉച്ചക്ക് ഒരു മണിയോടെ കോളജില്‍ നിന്നും ബൈക്കില്‍ വീട്ടിലേക്ക് പോകുമ്പോഴാണ് നാല് ബൈക്കുളിലായിയെത്തിയ സംഘം ആക്രമിച്ചത്. ശബ്ദം കേട്ട് ഓടിയെത്തിയ നാട്ടുകാരാണ് അജ്മലിനെ അക്രമികളില്‍ നിന്നും രക്ഷിച്ചത്. ഇരുമ്പ് വടികളും വാളുകളുമായാണ് ആക്രമിച്ചതെന്ന് അജ്മല്‍പറഞ്ഞു. പരുക്കേറ്റ അജ്മലിനെ എടപ്പാളിലെ ആശുപത്രിയില്‍ പ്രവേശിപ്പിച്ചു.