മാനന്തവാടി: യുവതിയേയും പെണ്‍കുട്ടിയേയും പീഡിപ്പിച്ച കേസുകളില്‍ രണ്ടുപേര്‍ പിടിയില്‍. പതിനൊന്നുകാരിയെ പീഡിപ്പിക്കാന്‍ ശ്രമിച്ച യുവാവിനെ തലപ്പുഴ പൊലിസാണ് അറസ്റ്റ് ചെയ്തത്. തവിഞ്ഞാല്‍ വെണ്‍മണി അടിമാറി അപ്പച്ചനാ (39)ണ് പിടിയിലായത്. ഇയാള്‍ക്കെതിരെ പോക്‌സോ നിയമപ്രകാരം കേസെടുത്തിട്ടുണ്ട്.
ദലിത് യുവതിയെ വീട്ടില്‍ കയറി പീഡിപ്പിക്കാന്‍ ശ്രമിച്ച വിവരാവകാശ പ്രവര്‍ത്തകനാണ് അറസ്റ്റിലായ മറ്റൊരു പ്രതി. തലപ്പുഴ കരുണാലയം മുരളി (46) യെയാണ് മാനന്തവാടി പൊലിസ് അറസ്റ്റ് ചെയ്തത്. രണ്ട് മാസം മുന്‍പ് ദലിത് യുവതിയെ രാത്രി വീട്ടില്‍ കയറി പീഡിപ്പിക്കാന്‍ ശ്രമിച്ചെന്ന പരാതിയുടെ അടിസ്ഥാനത്തില്‍ ഇയാള്‍ക്കെതിരെ പീഡനശ്രമ കുറ്റത്തിനും എസ്.സി, എസ്.ടി ആക്ട് പ്രകാരവും തലപ്പുഴ പൊലിസ് കേസ് രജിസ്റ്റര്‍ ചെയ്തിരുന്നു.
പിന്നീട് അന്വേഷണ ചുമതല പൊലിസ് ഏറ്റെടുക്കുകയായിരുന്നു. ഇതിനിടയില്‍ ഒളിവില്‍ പോയ മുരളി ഹൈക്കോടതിയില്‍ നിന്നും മുന്‍കൂര്‍ ജാമ്യത്തിന് ശ്രമിച്ചെങ്കിലും ജാമ്യം ലഭിച്ചില്ല. തുടര്‍ന്ന് കോടതിയില്‍ കീഴടങ്ങുകയായിരുന്നു. ഇരു പ്രതികളേയും കോടതി റിമാന്‍ഡ് ചെയ്തു.