പാലക്കാട്: നഗരത്തില്‍ മാസങ്ങള്‍ക്കു മുന്‍പ് ബഹുനില കെട്ടിടം തകര്‍ന്നുവീണത്തിന്റെ പശ്ചാത്തലത്തില്‍ അടച്ചുപൂട്ടിയ മുന്‍സിപ്പല്‍ ബസ് സ്റ്റാന്‍ഡ് മാസങ്ങള്‍ക്കു ശേഷം ബസുകള്‍ തിരിച്ചെത്തിച്ച് പ്രവര്‍ത്തന സജ്ജമായെങ്കിലും യാത്രക്കാരുടെ സുരക്ഷ കടലാസില്‍ മാത്രം.
സ്റ്റാന്‍ഡിനകത്ത് ഡ്യൂട്ടി പൊലിസിന്റെ സേവനമില്ലാത്തത് യാത്രക്കാരുടെ സുരക്ഷയെ ചോദ്യം ചെയ്യുകയാണ്. ചെര്‍പ്പുളശ്ശേരി-ശ്രീകൃഷ്ണപുരം, തോലനൂര്‍, കോങ്ങാട്, പത്തിരിപ്പാല ബസുകളാണ് നിലവില്‍ മുന്‍സിപ്പല്‍ ബസ് സ്റ്റാന്‍ഡില്‍നിന്ന് സര്‍വിസ് നടത്തുന്നതെങ്കില്‍ നേരത്തെയുണ്ടായിരുന്ന പൂടൂര്‍, കോട്ടായി, പെരുങ്ങോട്ടുകുറിശ്ശി, മണ്ണാര്‍ക്കാട്, കോഴിക്കോട്, കമ്പ ബസുകളെല്ലാം ഇപ്പോഴും സ്റ്റേഡിയം ബസ് സ്റ്റാന്‍ഡില്‍ തന്നെയാണ്.
നേരത്തെ മുന്‍സിപ്പല്‍ ബസ് സ്റ്റാന്‍ഡ് എയ്ഡ്‌പോസ്റ്റില്‍ പ്രവര്‍ത്തിച്ചിരുന്നെങ്കില്‍ സ്റ്റാന്‍ഡിന്റെ തകര്‍ച്ചയെ തുടര്‍ന്ന് കമ്പിവേലിയുപയോഗിച്ച് സ്റ്റാന്‍ഡിനകത്തേയ്ക്കുള്ള പ്രവേശനം അടച്ചിരിക്കുകയായിരുന്നു. ന്നാല്‍ ബസുകള്‍ തിരിച്ചെത്തിക്കുന്നതിനായി സ്റ്റാന്‍ഡിന്റെ വടക്കു-കിഴക്കുഭാഗത്തെ അഴുക്കു ചാലുകള്‍ക്കു മുന്‍പില്‍ മൂന്നു കാരത്തിരിപ്പു കേന്ദ്രങ്ങള്‍ മാത്രമാണ് സ്ഥാപിച്ചതെങ്കിലും ഇത് യാത്രക്കാരെ അവഗണിക്കുന്ന മട്ടാണ്. ബസുകളിലെ ജീവനക്കാരാവട്ടെ കെട്ടിടത്തിനു താഴെ ഇരുമ്പുകമ്പിയും ചാരി നില്‍പ്പാണ്. ബസുകള്‍ തിരിച്ചെത്തി മുന്‍സിപ്പല്‍ സ്റ്റാന്‍ഡ് പ്രവര്‍ത്തന സജ്ജമായി മാസങ്ങളായിട്ടും ഇവിടെയൊരു പൊലിസിന്റെ സേവനത്തെപ്പറ്റി ബന്ധപ്പെട്ടവര്‍ ചിന്തിച്ചിട്ടേയില്ലയെന്നതാണ് പരിതാപകരം.
സന്ധ്യ മയങ്ങിയാല്‍ സ്റ്റാന്‍ഡിനകത്ത് എന്തും സംഭവിക്കാമെന്ന സ്ഥിതിയാണ്. പകല്‍ സമയത്ത് സ്റ്റാന്‍ഡിനകത്തും പരിസരത്തും അഭിസാരികമാരായ സ്ത്രീകളുടെ താവളമാണെന്നിരിക്കെ ഇത് വിദ്യാര്‍ഥികള്‍ക്കും സ്ത്രീയാത്രക്കാര്‍ക്കും പലപ്പോഴും ദുരിതം തീര്‍ക്കുന്നുണ്ട്. സ്റ്റാന്‍ഡിനകത്ത് എയ്ഡ്‌പോസ്റ്റോ, പൊലിസോ ഇല്ലാതായതോടെ ആര്‍ക്കും ആരെയും പേടിയില്ലാത്ത സ്ഥിതിയാണ്. ബസ് ബേയാക്കി ഉയര്‍ത്താനൊരുങ്ങുന്ന മുനിസിപ്പല്‍ സ്റ്റാന്‍ഡില്‍ യാത്രക്കാര്‍ക്കുള്ള അടിസ്ഥാന സൗകര്യങ്ങള്‍ പോലുമില്ലായെന്നതാണ് സത്യം.
ഒരു സ്റ്റാന്‍ഡിനകത്ത് എയ്ഡ്‌പോസ്റ്റ്, ജീവനക്കാര്‍ക്കുള്ള വിശ്രമമുറി, മുലയൂട്ടല്‍ റൂം, കുടിവെള്ളം, അഗ്നിരക്ഷാസംവിധാനം എന്നിവയൊക്കെ വേണമെന്നിരിക്കെ രണ്ടുകാത്തിരിപ്പുകേന്ദ്രങ്ങള്‍മാത്രം നിര്‍മിച്ച് ബസ് സ്റ്റാന്‍ഡിലേയ്ക്ക് ബസുകളെത്തിച്ച് നഗരസഭ തടിയൂരുകയായിരുന്നു. എന്നാല്‍ സ്റ്റാന്‍ഡിനകത്ത് ബസുകളും നിരവധി യാത്രക്കാരുമെത്തിയിട്ടും യാത്രക്കാരുടെ സുരക്ഷക്കായി ഒരു എയ്ഡ്‌പോസ്റ്റ് സ്ഥാപിച്ച് പൊലിസിന്റെ സേവനം തുടങ്ങണമെന്നാണ് യാത്രക്കാരുടെ ശക്തമായ ആവശ്യം.