ഇരിട്ടി: അഴിമതി നടത്തിയതിന്റെ പേരില്‍ കേരളത്തില്‍ ആദ്യമായി ഒരു പഞ്ചായത്ത് പ്രസിഡന്റ് ജയിലില്‍ കിടന്നിട്ടുണ്ടെങ്കില്‍ അത് കീഴൂര്‍ ചാവശേരി പഞ്ചായത്തിലാണെന്നും പ്രഥമ ഇരിട്ടി മുനിസിപ്പാലിറ്റിയിലെ ഉദ്യോഗസ്ഥന്‍മാരെ നിലക്ക് നിര്‍ത്തിയില്ലെങ്കില്‍ ചെയര്‍മാനും ജയിലില്‍ കിടക്കേണ്ടി വരുമെന്നും മുസ്‌ലിംലീഗ് ജില്ലാ സെക്രട്ടറി അഡ്വ.കെ മുഹമ്മദലി. ഭരണം മറിച്ചിടാന്‍ മുസ്‌ലിം ലീഗ് ഒന്നു മൂളിയാല്‍ കഴിയും. 33 അംഗ മുന്‍സിപ്പാലിറ്റിയില്‍ ബി.ജെ.പി ഉള്‍പ്പെടെ 19 അംഗങ്ങള്‍ പ്രതിപക്ഷത്താണെന്നുള്ള കാര്യം മറക്കരുതെന്നും അദ്ദേഹം പറഞ്ഞു. വിവിധ ആവശ്യങ്ങള്‍ ഉന്നയിച്ച് മുസ്‌ലിം ലീഗ് ഇരിട്ടി മുനിസിപ്പല്‍ കമ്മിറ്റി മുനിസിപ്പല്‍ ഓഫിസിലേക്ക്   നടത്തിയ മാര്‍ച്ച് ഉദ്ഘാടനം ചെയ്ത് സംസാരിക്കുകയായിരുന്നു. യു.പി മുഹമ്മദ് അധ്യക്ഷനായി. സി.എ ലത്തീഫ്, സി അബ്ദുല്ല, സമീര്‍ പുന്നാട്, പി.പി അബ്ദുല്‍ഖാദര്‍, സഹീര്‍ സംസാരിച്ചു.