റിയാദ്: കൊവിഡ് 19 കൊറോണ വൈറസ് വ്യാപനത്തോടെ വിമാന കമ്പനികൾ സർവ്വീസ് റദ്ദാക്കിയതോടെ നഷ്ടം കുമിഞ്ഞു കൂടുന്നതായി റിപ്പോർട്ട്. ജനുവരി മുതൽ മാർച്ച് 11 വരെയുള്ള കണക്കുകൾ പ്രകാരം ഗൾഫ് മേഖലയിൽ മാത്രം ഏഴ് ബില്യൺ റിയാലിന്റെ നഷ്ടമാണ് രേഖപ്പെടുത്തിയത്. എന്നാൽ മിഡിൽ ഈസ്റ്റിൽ ഇത് 7 ബില്യൺ ഡോളർ  നഷ്ടമാണ് വിമാന കമ്പനികൾ നേരിടുന്നത്. ജനുവരി അവസാനം മുതൽ മിഡിൽ ഈസ്റ്റിൽ 16,000 വിമാന സർവീസുകൾ റദ്ദാക്കിയെന്നാണ് അയാട്ടയുടെ (ഇന്റർനാഷണൽ എയർ ട്രാൻസ്‌പോർട്ട് അസോസിയേഷൻ) കണക്ക്. ഈ മേഖലയിൽ 3,47,000 പേരുടെ ജോലിയും ഭീഷണിയുടെ വക്കിലുമാണ്. 9/11 ആക്രമണം, സാർസ് വൈറസ് ബാധ, 2008 ലെ ആഗോള സാമ്പത്തിക പ്രതിസന്ധി എന്നിവയെക്കാൾ എത്രയോ പതിന്മടങ്ങാണ് നിലവിലെ പ്രതിസന്ധിയെന്നും കൂടുതൽ വ്യാപകമായിട്ടുണ്ടെന്നും അയാട്ട ഡയരക്ടർ ജനറലും സിഇഒ യുമായ അലക്‌സാണ്ടർ ഡി ജൂനിയക് പറഞ്ഞു. 
       സഊദിയിൽ മാത്രം വിമാനക്കമ്പനികൾക്ക് 3.1 ബില്യൺ ഡോളറിന്റെ വരുമാന ഇടിവും 1,40,300 പേർക്ക് തൊഴിൽ നഷ്ടവുമാണെന്നാണ് അയാട്ടയുടെ റിപ്പോർട്ട് പറയുന്നത്. യു.എ.ഇയിൽ 2.8 ബില്യൺ ഡോളർ വരുമാനക്കുറവും 1,63,000 പേർക്ക് തൊഴിൽ നഷ്ട ഭീഷണിയും നിലനിൽക്കുന്നു. ബഹ്‌റൈനിൽ 204 മില്യൺ ഡോളർ നഷ്ടവും 5100 തൊഴിൽ ഭീഷണി, കുവൈത്ത് 547 മില്യൺ ഡോളർ 19800 പേർക്ക് തൊഴിൽ ഭീഷണി, ഒമാൻ 238 മില്യൺ ഡോളർ 36700 പേർക്ക് തൊഴിൽ ഭീഷണി എന്നിങ്ങനെയാണ് വരുമാന നഷ്ടം കണക്കാക്കുന്നത്.
       കൊവിഡ് 19 ഭീഷണിയുടെ പശ്ചാത്തലത്തിൽ നിരവധി പേർ ബുക്കിംഗ് കാൻസൽ ചെയ്യുകയോ യാത്ര വേണ്ടെന്നുവെക്കുകയോ ചെയ്തത് വ്യോമയാന മേഖലയെ സാരമായി ബാധിച്ചു. മാർച്ച് 11 വരെ 27 ബില്യൺ റിയാൽ വരുമാനത്തിൽ ഇടിവുമുണ്ടായി. കഴിഞ്ഞ വർഷത്തേക്കാൾ 75 ശതമാനം വരെ ടിക്കറ്റ് റീഫണ്ടിങ്ങാണ് നടന്നത്. ഇത് മൂലം വിമാന കമ്പനികൾക്ക് വൻ തുകയാണ് തിരിച്ചു നൽകേണ്ടി വന്നത്. മാർച്ച്, ഏപ്രിൽ മാസങ്ങളിലെ ബുക്കിംഗിൽ കഴിഞ്ഞ വർഷത്തേക്കാൾ 40 ശതമാനമാണ് കുറവും രേഖപ്പെടുത്തിയിട്ടുണ്ട്. അന്താരാഷ്ട്ര എയർലൈനുകൾക്ക് പ്രതിസന്ധി മറികടക്കാൻ 200 ബില്യൺ ഡോളറിന്റെ പാക്കേജ് ആവശ്യമായി വരുമെന്നാണ് കരുതുന്നത്.