ദോഹ: 2016ല്‍ ഖത്തര്‍ ആഭ്യന്തരമന്ത്രാലയം പൂര്‍ത്തിയാക്കിയത് 71,565,367 ഇടപാടുകള്‍. ഓണ്‍ലൈന്‍ സേവനങ്ങളുള്‍പ്പെടെയുള്ള വിവരമാണിത്.അഥവാ മാസത്തില്‍ ശരാശരി 5,963,781 ഇടപാടുകളും പ്രതിദിനം 198,793 ഇടപാടുകളും നടത്തുന്നു. ഒരു മിനുട്ടില്‍ ശരാശരി 138 ഇടപാടുകള്‍ നടക്കുന്നുണ്ട്. മണിക്കൂറില്‍ 8,283 ഇടപാടുകളാണ് മന്ത്രാലയവുമായി ബന്ധപ്പെട്ട് നടക്കുന്നത്. ഇതില്‍ 67 ശതമാനം സേവനങ്ങളും ഓണ്‍ലൈന്‍ മുഖേനയാണ്. ബാക്കിയുള്ളവ സര്‍വീസ് സെന്ററുകളിലൂടെയും. മന്ത്രാലയത്തിന്റെ അടിയന്തര സേവന നമ്പറായ 999 ഉപയോഗപ്പെടുത്തിയവര്‍ 3,389,606 പേരാണ്. ട്രാഫിക്, പരുക്ക്, അസുഖം, പരാതികള്‍, അന്വേഷണങ്ങള്‍, തീ പിടിത്തം തുടങ്ങിയ ആവശ്യങ്ങള്‍ക്കാണ് ആളുകള്‍ എമര്‍ജന്‍സി നമ്പറില്‍ വിളിക്കുന്നത്. വിസ സര്‍വീസ് (6,857,124), റസിഡന്‍സി ഇടപാടുകള്‍ (3,245,873), എന്‍ട്രി, എക്‌സിറ്റ് പെര്‍മിറ്റുകള്‍ (18,583,651) പോലീസ് ക്ലിയറന്‍സ് സര്‍ട്ടിഫിക്കറ്റ് (46,947), ബില്‍ഡിംഗ് പെര്‍മിറ്റ് (56,265) സേവനങ്ങള്‍ മന്ത്രാലയം കഴിഞ്ഞ വര്‍ഷം നല്‍കി. 90,694 വാഹനങ്ങള്‍ രജിസ്റ്റര്‍ ചെയ്തപ്പോള്‍ 94,680 പേര്‍ക്ക് ഡ്രൈവിംഗ് ലൈസന്‍സ് നല്‍കി. 972,007 വാഹനങ്ങളില്‍ സാങ്കേതിക പരിശോധനയും പൂര്‍ത്തിയാക്കി.മന്ത്രാലയത്തിന്റെ സേവനങ്ങളില്‍ മെത്രാഷ് 2 ആപ്പ് ആണ് താരം. 2015നെ അപേക്ഷിച്ച് ഉപഭോക്താക്കള്‍ 73.3 ശതമാനം ഉയര്‍ന്നു. കഴിഞ്ഞ വര്‍ഷം 2,267,698 ഇടപാടുകളാണ് മെത്രാഷ് രണ്ടില്‍ നടന്നത്. 96 ശതമാനം സേവനങ്ങളു ഇപ്പോള്‍ മെട്രാഷില്‍ ലഭ്യമാണ്. മെട്രാഷ് 2 ആപ്പ് ഈ രംഗത്ത് മികച്ച ഫലമുണ്ടാക്കി. മന്ത്രാലയത്തിന്റെയും ഹുകൂമിയുടെയും വെബ്‌സൈറ്റുകളും മികച്ച സേവനം നല്‍കുന്നു. ജനങ്ങള്‍ക്കിടയില്‍നിന്ന് അഭിപ്രായ സര്‍വേ നടത്തി സേവനം മെച്ചപ്പെടുത്താന്‍ ശ്രമിച്ചു വരുന്നു. ഓരോ ഇടപാടുകളുടെയും സമയം, മികവ്, അംഗീകാരം എന്നിവയെല്ലാം വിലയിരുത്തുന്നു. മന്ത്രാലയം സേവനങ്ങളില്‍ 95 ശതമാനം പേരും സംതൃപ്തി രേഖപ്പടുത്തുന്നു. കഴിഞ്ഞ വര്‍ഷം 91 ശതമാനമായിരുന്നു സംതൃപ്തര്‍.