ഹരാരെ: സിംബാബ്‌വെയില്‍ പീഡനക്കേസില്‍ അറസ്റ്റിലായത് ഇന്ത്യന്‍ ക്രിക്കറ്റ് താരമല്ലെന്ന് കേന്ദ്ര സര്‍ക്കാര്‍. ഇന്ത്യന്‍ ക്രിക്കറ്റ് താരം സിംബാബ്‌വെയില്‍ പീഡനക്കേസില്‍ അറസ്റ്റിലായെന്ന വാര്‍ത്ത വിദേശകാര്യ മന്ത്രാലയമാണ് നിഷേധിച്ച് രംഗത്തുവന്നത്. സിംബാബ്‌വെ നയതന്ത്ര പ്രതിനിധിയുമായി ഇതു സംബന്ധിച്ച് ചര്‍ച്ച നടത്തിയെന്നും വാര്‍ത്ത വ്യാജമാണെന്നുമാണ് വിദേശകാര്യ മന്ത്രാലയ വക്താവ് അറിയിച്ചത്. ഇന്ത്യന്‍ ടീമിന്റെ സ്‌പോണ്‍സര്‍മാരുമായി ബന്ധപ്പെട്ട ഒരാളാണ് അറസ്റ്റിലായതെന്നാണ് സൂചന. എന്നാല്‍ ഇയാളും കുറ്റം നിഷേധിച്ചതാണറിയുന്നത്.

ഇന്ത്യന്‍ ക്രിക്കറ്റ് ടീമിലെ ഒരംഗം ബലാത്സംഗക്കുറ്റത്തിന് അറസ്റ്റിലായതായി സിംബാബ്‌വെയിലെ ഒരു ന്യൂസ് ഏജന്‍സി കഴിഞ്ഞ ദിവസം റിപ്പോര്‍ട്ട് ചെയ്തിരുന്നത്. ഇന്ത്യന്‍ ടീമംഗങ്ങള്‍ താമസിക്കുന്ന ഹോട്ടലിലെ അന്തേവാസിയായ സ്ത്രീയെ മാനഭംഗപ്പെടുത്തിയ കേസില്‍ അറസ്റ്റെന്നായിരുന്നു വാര്‍ത്ത.