കൊച്ചി: സ്‌കൂള്‍, കോളജ് തലം മുതല്‍ പാഠ്യപദ്ധതിയില്‍ സംരംഭകത്വം ഉള്‍പ്പെടുത്തുന്നകാര്യം സജീവ പരിഗണനയിലാണെന്ന് അഡിഷനല്‍ ചീഫ് സെക്രട്ടറി ടോം ജോസ്. ഇന്ത്യ സ്‌കില്‍സ് കേരള 2018 പോലുള്ള നൈപുണ്യമേളകളില്‍ സംരംഭക താല്‍പര്യമുള്ളവര്‍ക്ക് എല്ലാ വിധ പ്രോത്സാഹനവും സംസ്ഥാന സര്‍ക്കാര്‍ നല്‍കുമെന്നും അദ്ദേഹം പറഞ്ഞു.
വ്യാവസായിക പരിശീലന വകുപ്പും കേരള അക്കാദമി ഫോര്‍ സ്‌കില്‍ എക്‌സലന്‍സും (കെയ്‌സ്) സംയുക്തമായി സംഘടിപ്പിക്കുന്ന നൈപുണ്യമേളയില്‍ മത്സരങ്ങള്‍ നടക്കുന്ന സ്റ്റാളുകള്‍ സന്ദര്‍ശിക്കാനെത്തിയതായിരുന്നു അദ്ദേഹം.
കേരളത്തില്‍ സംരംഭക താല്‍പര്യമുള്ള യുവാക്കള്‍ കുറവാണ്. എന്നാല്‍ മികച്ച തൊഴില്‍ നൈപുണ്യമുള്ള ചെറുപ്പക്കാര്‍ ഇവിടെയുണ്ട്. അവരില്‍ സംരംഭകത്വം വളര്‍ത്തിയെടുക്കാന്‍ കെയ്‌സ് മികച്ച പ്രവര്‍ത്തനമാണ് നടത്തുന്നത്.
സ്‌കൂള്‍ തലം മുതല്‍ ഈ വിഷയം പാഠ്യപദ്ധതിയില്‍ ഉള്‍പ്പെടുത്തിയാല്‍ വിദ്യാര്‍ഥികളുടെ മനോഭാവത്തില്‍ വലിയ മാറ്റങ്ങള്‍ ഉണ്ടാകും. ഇതാണ് സര്‍ക്കാരിന്റെ സജീവ പരിഗണനയിലുള്ളത്. കെയ്‌സ് ഇക്കാര്യത്തില്‍ എല്ലാ സഹായവും നല്‍കുന്നുണ്ടെന്നും അദ്ദേഹം പറഞ്ഞു.
ഇന്ത്യ സ്‌കില്‍സ് കേരള 2018ല്‍ ഉരുത്തിരിയുന്ന നൂതനമായ ആശയങ്ങളെയും മാതൃകകളെയും സര്‍ക്കാര്‍ സംവിധാനത്തിലേക്ക് ഏറ്റെടുക്കാനുള്ള പദ്ധതിയുണ്ട്.
പൊതു മാനദണ്ഡങ്ങള്‍ പാലിച്ചുള്ള വിലയിരുത്തലിനു ശേഷമായിരിക്കും സര്‍ക്കാര്‍ ഇക്കാര്യത്തില്‍ നടപടിയെടുക്കുകയെന്നും അദ്ദേഹം പറഞ്ഞു.
സംസ്ഥാനമൊട്ടാകെ നടന്ന ഇന്ത്യ സ്‌കില്‍സ് കേരള 2018 മത്സരങ്ങളില്‍ ആകെ 7422 പേരാണ് 20 ട്രേഡുകളിലായി പങ്കെടുത്തത്. വിജയികളായ 112 പേരാണ് രണ്ടു ദിവസങ്ങളിലായി കൊച്ചിയില്‍ നടക്കുന്ന സംസ്ഥാനതല മത്സരത്തില്‍ മാറ്റുരയ്ക്കുന്നത്.