റിയാദ്: വിവിധ മേഖലകളില്‍ ഉയര്‍ന്ന തോതിലുള്ള ശക്തമായ സഊദി വല്‍ക്കരണം നടപ്പിലാക്കാന്‍ ശ്രമിക്കുന്ന സര്‍ക്കാര്‍ ശ്രമം ചില്ലറ വ്യാപാര മേഖലകളില്‍ എളുപ്പമെല്ലെന്നു വിദഗ്ധര്‍. പതിനേഴു ലക്ഷം തൊഴിലവസരങ്ങളുള്ള ചില്ലറ വ്യാപാര മേഖലകളില്‍ പ്രധാന മൂന്നു വെല്ലു വിളികളാണ് നേരിടുന്നതെന്നും അവ മറികടക്കാന്‍ ഇപ്പോഴത്തെ അവസ്ഥയില്‍ പ്രയാസമാണെന്നും സഊദി ഇക്കണോമിക് സൊസൈറ്റി അംഗം ഡോ. ഉസാം ഖലീഫ പറഞ്ഞു.

കുറഞ്ഞ വേതനവും സുദീര്‍ഘമായ തൊഴില്‍ സമയവും പരിശീലനത്തിന്റെയും പരിചയസമ്പത്തിന്റെയും അഭാവവും നിര്‍ബന്ധിത സഊദി വല്‍ക്കരണത്തിനു തടസ്സം നേരിടുന്നത്. ഇരുപതു ലക്ഷത്തോളം വിദേശികള്‍ കൈകാര്യം ചെയ്യുന്ന ചില്ലറ വില്‍പ്പന മേഖലയില്‍ നിലവില്‍ സഊദികള്‍ വെറും മൂന്നു ലക്ഷം മാത്രമാണ്. ഇവരില്‍ ഭൂരിഭാഗവും കാഷ്യര്‍മാരും സൂപ്പര്‍വൈസര്‍മാരുമാണ്.

സഊദി വല്‍ക്കരണത്തിനു തടസ്സമാകുന്ന സുദീര്‍ഘമായ ജോലി സമയവും അവധികളുടെ കുറവും പരിഗണിക്കണമെന്നും നേരത്തെ ധാരണയിലെത്തിയ സ്വകാര്യ മേഖലയില്‍ ദ്വിദിന അവധി നടപ്പാക്കുന്നതിന് അധികൃതര്‍ ശ്രദ്ധ ചെലുത്തണമെന്നും വിദഗ്ദ്ധര്‍ ആവശ്യപ്പെട്ടിട്ടുണ്ട്. 

വര്‍ധിച്ചുവരുന്ന ജീവിത ചെലവ് കണക്കിലെടുത്ത് സ്വദേശികളുടെ മിനിമം വേതനം നാലായിരം റിയാലായി നിശ്ചയിക്കണമെന്ന് സാമ്പത്തിക വിദഗ്ധന്‍ ഡോ. അബ്ദുറസാഖ് അല്‍മദനി ആവശ്യപ്പെട്ടു. വലിയ പരിചയസമ്പത്തുള്ള വിദേശികള്‍ക്കു പകരം നില്‍ക്കുന്നതിന് സഊദികള്‍ക്ക് സാധിക്കില്ല എന്ന വാദം ഉന്നയിച്ച്, ചില്ലറ വ്യാപാര മേഖലയിലെ സഊദി വല്‍ക്കരണം ഉല്‍പന്നങ്ങളുടെ വില ഉയര്‍ത്തുന്നതിന് ചില വ്യവസായികളെ പ്രേരിപ്പിച്ചേക്കുമെന്നും അദ്ദേഹം പറഞ്ഞു.