ശ്രീനഗര്‍: ഐ ലീഗില്‍ ഗോകുലത്തിന്റെ തോല്‍വി തുടരുന്നു. ഇന്നലെ നടന്ന മത്സരത്തില്‍ റിയല്‍ കശ്മീരിനോടാണ് ഗോകുലം പരാജയപ്പെട്ടത്. എതിരില്ലാത്ത ഒരു ഗോളിനായിരുന്നു ഗോകുലത്തിന്റെ തോല്‍വി. 51-ാം മിനിട്ടില്‍ നെഹെറെ ക്രിസോയാണ് റിയലിന് വേണ്ടി ഗോള്‍ നേടിയത്. കഴിഞ്ഞ മത്സരത്തില്‍ ഇറങ്ങിയ ഇലവനില്‍ മാറ്റം വരുത്തിയായിരുന്നു ഗോകുലം ഇന്നലെ ഇറങ്ങിയത്. ഇര്‍ഷാദിന്റെ നേതൃത്വത്തിലായിരുന്നു ഗോകുലം ഇറങ്ങിയത്. ഗോള്‍ മടക്കി സമനിലയെങ്കിലും പിടിക്കാന്‍ ഗോകുലം ശ്രമങ്ങള്‍ നടത്തി നോക്കിയെങ്കിലും ഫലം കണ്ടില്ല. ഇതോടെ തുടര്‍ച്ചയായ ആറാം മത്സരത്തിലും ഗോകുലത്തിന് ജയം കണ്ടെത്താനായില്ല. ഇതോടെ 15 മത്സരത്തില്‍ നിന്ന് 12 പോയിന്റുമായി ഗോകുലം 10-ാം സ്ഥാനത്ത് നില്‍ക്കുന്നു. 10 പോയിന്റുള്ള ലജോങ് മാത്രമാണ് ഇനി ഗോകുലത്തിന് താഴെയുള്ളത്. 16 മത്സരത്തില്‍നിന്ന് 32 പോയിന്റുമായി റിയല്‍ കശ്മീര്‍ പോയിന്റ് പട്ടികയില്‍ ഒന്നാമതെത്തി. ഈ മാസം 10ന് ഐസ്വാളുമായി കോഴിക്കോട് കോര്‍പറേഷന്‍ സ്റ്റേഡിയത്തിലാണ് ഗോകുലത്തിന്റെ അടുത്ത മത്സരം.