തുറവൂര്‍: തുറവൂര്‍ കവലയില്‍ ബൈക്കും ലോറിയും കൂട്ടിയിടിച്ച് യുവാക്കള്‍ക്ക് പരുക്കേറ്റു. ഒരാളുടെ നില ഗുരുതരം. ഇന്നലെ പകല്‍ പതിനൊന്നിനായിരുന്നു അപകടം.
കവലയിലെ ട്രാഫിക്ക് സിഗ്‌നല്‍ ശ്രദ്ധിക്കാതെ വാഹനങ്ങള്‍ ഓടിച്ചതാണ് അപകടത്തിന് കാരണമെന്ന് പറയുന്നു. നാട്ടുകാര്‍ ഉടനെ പരുക്കേറ്റവരെ തുറവൂര്‍ താലൂക്കാശുപത്രിയില്‍ എത്തിച്ചെങ്കിലും പ്രാഥമിക ശുശ്രൂഷകള്‍ക്കുശേഷം ഗുരുതരമായ പരുക്കേറ്റ എറണാകുളം അറയ്ക്കല്‍ വീട്ടില്‍ ബെര്‍ലിന്‍ പോളി (25)നെ എറണാകുളത്തെ സ്വകാര്യാശുപത്രിയില്‍ പ്രവേശിപ്പിച്ചു.
ബൈക്കിലുണ്ടായിരുന്ന സഹയാത്രികനെ ചേര്‍ത്തലയിലെ സ്വകാര്യാശുപത്രിയിലും പ്രവേശിച്ചിരിക്കുകയാണ്. കുത്തിയതോട് പൊലിസ് എസ്.ഐ എ.എല്‍ അഭിലാഷിന്റെ നേതൃത്വത്തിലുള്ള പൊലിസ് സംഘമെത്തി തടസപ്പെട്ടു കിടന്ന വാഹന ഗതാഗതം പുനഃസ്ഥാപിച്ചു. കുത്തിയതോട് പൊലിസ് കേസ് രജിസ്റ്റര്‍ ചെയ്തു.