കാഞ്ഞങ്ങാട്: വായനയെ യന്ത്രസമാനമായ ഉപകരണങ്ങളില്‍ പരിമിതപ്പെടുത്താന്‍ കഴിയുന്ന ഇലക്ട്രോണിക് യുഗത്തില്‍ ലൈബ്രറികളെ കാലോചിതമായ മാറ്റത്തിനും നവീകരണത്തിനും വിധേയമാക്കിയുള്ള പരിഷ്‌കാരങ്ങള്‍ വരുത്താന്‍ ഗ്രന്ഥശാലാ പ്രസ്ഥാനത്തിന് കഴിയണമെന്ന് സാഹിത്യ അക്കാദമി ചെയര്‍മാന്‍ ഡോ. കെ.പി മോഹനന്‍.
ജില്ലാ ലൈബ്രറി കൗണ്‍സില്‍ വികസനസമിതി ആലാമിപ്പള്ളി പുതിയ ബസ്സ്റ്റാന്‍ഡ് പരിസരത്ത് മുന്നുദിവസങ്ങളിലായി സംഘടിപ്പിക്കുന്ന പുസ്തകോത്സവവും ആദരസമ്മേളനവും ഉദ്ഘാടനം ചെയ്യുകയായിരുന്നു അദ്ദേഹം.
നഗരസഭാ ചെയര്‍മാന്‍ വി.വി രമേശന്‍ അധ്യക്ഷനായി. കവി മുരുഗന്‍ കാട്ടാക്കട മുഖ്യാതിഥിയായി.
ചടങ്ങില്‍ മികച്ച ഗ്രന്ഥശാല പ്രവര്‍ത്തകനുള്ള കേരള സാഹിത്യ അക്കാകദമി അവാര്‍ഡ് നേടിയ ടി.വി കുഞ്ഞാമന്‍, കേന്ദ്ര സാഹിത്യ അക്കാദമി അവാര്‍ഡ് നേടിയ എസ്.ആര്‍ ലാല്‍, പി.എന്‍ പണിക്കര്‍ അവാര്‍ഡ് ജേതാവ് സി. നാരായണന്‍ അണ്ടോള്‍, മാധ്യമപ്രവര്‍ത്തകന്‍ ടി.കെ നാരായണന്‍, നാടകപ്രവര്‍ത്തകന്‍ നന്ദകുമാര്‍ മാണിയാട്ട്, ജി. ശങ്കരപിള്ള അവാര്‍ഡ് ജേതാവ് രാജ്‌മോഹന്‍ നീലേശ്വരം എന്നിവര്‍ക്ക് ലൈബ്രറി കൗണ്‍സിലിന്റെ ആദരവ് ഡോ. കെ.പി മോഹനന്‍ സമര്‍പ്പിച്ചു. കേരള സാഹിത്യ അക്കാദമി നിര്‍വാഹക സമിതിയംഗം ഇ.പി രാജഗോപാലന്‍ ആദരഭാഷണം നടത്തി. സുറാബിന്റെ കവിതാ സമാഹാരം 'കാസര്‍കോട്', പി.വി.കെ പൊതുവാള്‍ വിവര്‍ത്തനം ചെയ്ത 'ആന്‍ഫ്രാങ്കിന്റെ ഒളിമുറിയില്‍നിന്നള്ള സാഹിത്യസൃഷ്ടികള്‍', സന്തോഷ് പനയാലിന്റെ കഥാസമാഹാരം 'പെണ്ണുചൂണ്ടല്‍' എന്നിവ സംസ്ഥാന ലൈബ്രറി കൗണ്‍സില്‍ സെക്രട്ടറി പി. അപ്പുക്കുട്ടന്‍ ജില്ലാ ലൈബ്രറി കൗണ്‍സില്‍ പ്രസിഡന്റ് ഡോ. പി. പ്രഭാകരന് നല്‍കി പ്രകാശനം ചെയ്തു.