കോട്ടയം: വിവാദ കേന്ദ്രമായിരുന്ന മെത്രാന്‍ കായലില്‍ നാളെ കൊയ്ത്തുത്സവം. എട്ട് വര്‍ഷങ്ങള്‍ക്ക് ശേഷം കഴിഞ്ഞ നവംബര്‍ 10ന് മെത്രാന്‍ കായല്‍ പാടശേഖരത്തില്‍ ആദ്യമായി നെല്ല് വിതച്ച കാര്‍ഷിക വികസന കര്‍ഷക ക്ഷേമ വകുപ്പ് മന്ത്രി വി.എസ് സുനില്‍ കുമാര്‍ നാളെ മെത്രാന്‍ കായലില്‍ നടക്കുന്ന കൊയ്ത്തുത്സവത്തില്‍ പങ്കെടുത്ത് വിളവെടുപ്പ് ഉദ്ഘാടനം നിര്‍വഹിക്കും.
ജില്ലാ കലക്ടര്‍ സി.എ ലത വാര്‍ത്താസമ്മേളത്തില്‍ പരിപാടികള്‍ വിശദീകരിച്ചു. മെത്രാന്‍ കായലിലെ ആകെയുള്ള 315 ഏക്കറില്‍ 24 ഏക്കറാണ് ഭൂവുടമകളായ കര്‍ഷകര്‍ കൃഷി ചെയ്തത്. ബാക്കിയുള്ളവ സ്വകാര്യ കമ്പനികളുടെ ഉടമസ്ഥതയിലാണുള്ളത്. പാടശേഖര സമിതിയും ഇതര സംഘടനകളുമാണ് നെല്‍കൃഷി ചെയ്തത്.
സപ്ലൈകോയും ഓയില്‍പാമുമാണ് നെല്ലു സംഭരിക്കുന്നത്. ഏപ്രില്‍ മധ്യത്തോടെ സംഭരണമുള്‍പ്പെടെയുള്ള നടപടികള്‍ പൂര്‍ത്തിയാക്കാനാകുമെന്നാണ് കരുതുന്നത്. മെത്രാന്‍ കായലില്‍ സ്വകാര്യ കമ്പനികളും നെല്‍കൃഷി ചെയ്തു തുടങ്ങുമെന്നാണ് അറിയിച്ചിട്ടുള്ളത്. അവിടെ നെല്‍കൃഷിയല്ലാതെ മറ്റൊന്നും ചെയ്യാന്‍ കമ്പനികള്‍ക്ക് കഴിയില്ല. നെല്‍കൃഷി ലാഭകരമായി ചെയ്യാന്‍ കഴിയുമെന്നാണ് മെത്രാന്‍ കായലിലെ അനുഭവത്തില്‍ നിന്ന് വ്യക്തമാകുന്നതെന്ന് കൃഷി വകുപ്പ് ഉദ്യോഗസ്ഥര്‍ പറയുന്നു.
നാളെ രാവിലെ എട്ടിന് അഡ്വ. കെ. സുരേഷ് കുറുപ്പ് എം.എല്‍.എയുടെ അധ്യക്ഷതയില്‍ ചേരുന്ന പൊതുസമ്മേളനം ധനകാര്യ വകുപ്പ് മന്ത്രി ഡോ. തോമസ് ഐസക് ഉദ്ഘാടനം ചെയ്യും. ജോസ് കെ. മാണി എം.പി മുഖ്യപ്രഭാഷണം നടത്തും. ചടങ്ങില്‍ പ്രശസ്ത സിനിമാതാരം ശ്രീനിവാസന്‍ മെത്രാന്‍ കായല്‍ അരിയുടെ ബ്രാന്‍ഡ് ലോഗോ പ്രകാശനം ചെയ്യും.
എം.എല്‍.എ മാരായ കെ.എം. മാണി, തിരുവഞ്ചൂര്‍ രാധാകൃഷ്ണന്‍, മോന്‍സ് ജോസഫ്, ഡോ.എന്‍ ജയരാജ്, സി. കെ ആശ, ജില്ല പഞ്ചായത്ത് പ്രസിഡന്റ് ജോഷി ഫിലിപ്പ് എന്നിവര്‍ സംബന്ധിക്കും. കാര്‍ഷിക ഉല്‍പാദന കമ്മിഷണറും വകുപ്പ് സെക്രട്ടറിയുമായ രാജു നാരായണ സ്വാമി ഭക്ഷ്യ സുരക്ഷ സന്ദേശം നല്‍കും. വകുപ്പ് ഡയറക്ടര്‍ ബിജു പ്രഭാകര്‍ റിപ്പോര്‍ട്ടവതരിപ്പിക്കും. കുമരകം ഗ്രാമ പഞ്ചായത്ത് പ്രസിഡന്റ് എ.പി സലിമോന്‍ കുമരകം കാര്‍ഷിക വികസന പദ്ധതി സമര്‍പ്പണം നടത്തും.