ശ്രീനഗര്‍: എട്ട് മാസത്തെ തടങ്കലിനു ശേഷം ജമ്മുകശ്മീര്‍ മുന്‍ മുഖ്യമന്ത്രിയും നാഷനല്‍ കോണ്‍ഫറന്‍സ് നേതാവുമായ ഉമര്‍ അബ്ദുള്ളയ്ക്ക് മോചനം. ഫെബ്രുവരി അഞ്ചിന് പബ്ലിക് സേഫ്റ്റി ആക്റ്റ് (പി.എസ.്എ) പ്രകാരമുള്ള കുറ്റങ്ങള്‍ സുപ്രീംകോടതി റദ്ദാക്കിയതിനെ തുടര്‍ന്നാണ് ഉമര്‍ അബ്ദുള്ളയെ മോചിപ്പിച്ചത്. ജമ്മു കശ്മീരിന്റെ പ്രത്യേക പദവി റദ്ദാക്കിയതിനു പിന്നാലെ കഴിഞ്ഞ വര്‍ഷം ഓഗസ്റ്റ് 5 നാണ് ഉമര്‍ അബ്ദുള്ളയെ കസ്റ്റഡിയില്‍ എടുത്തത്. മാര്‍ച്ച് 10ന് 50 വയസ് തികഞ്ഞ ഉമര്‍ 232 ദിവസമാണ് പൊലിസ് കസ്റ്റഡിയില്‍ കഴിഞ്ഞത്.
നാഷനല്‍ കോണ്‍ഫറന്‍സ് നേതാവിനെ ആദ്യഘട്ടത്തില്‍ കരുതല്‍ തടങ്കലിലാക്കുകയും കസ്റ്റഡിയിലെടുക്കുകയും ഫെബ്രുവരിയില്‍ പി.എസ്.എ പ്രകാരമുള്ള കുറ്റം ചുമത്തുകയുമായിരുന്നു.ഉമര്‍ അബ്ദുള്ളയെ മോചിപ്പിക്കുന്നതിനെക്കുറിച്ച് നിലപാട് അറിയിക്കണമെന്ന് കേന്ദ്ര സര്‍ക്കാരിനോടും ജമ്മു കശ്മീര്‍ ഭരണകൂടത്തോടും സുപ്രീം കോടതി അടുത്തിടെ ആവശ്യപ്പെട്ടിരുന്നു.മോചിപ്പിക്കാന്‍ ഉദ്ദേശിക്കുന്നെങ്കില്‍ ഉടന്‍ മോചിപ്പിക്കണമെന്നും അല്ലങ്കില്‍ ഞങ്ങള്‍ക്ക് വിഷയം ഗൗരവത്തോടെ പരിഗണിക്കേണ്ടി വരുമെന്നും കോടതി വ്യക്തമാക്കുകയും കേന്ദ്ര സര്‍ക്കാരിന്റെ വിശദീകരണം തേടുകയും ചെയ്തിരുന്നു. ഇതിനിടയിലാണ് അദ്ദേഹത്തിന്റെ മോചനം. പൊതുസുരക്ഷാ നിയമ പ്രകാരം ഉമര്‍ അബ്ദുള്ളയെ തടഞ്ഞുവെച്ച ഉത്തരവ് കശ്മീര്‍ ഭരണകൂടം ഇന്നലെ എടുത്തുകളയുകയും ചെയ്തു. ഉമര്‍അബ്ദുള്ളയുടെ പിതാവും കശ്മീര്‍ മുന്‍ മുഖ്യന്ത്രിയുമായ ഫാറൂഖ് അബ്ദുള്ളയെ ഈ മാസം 13ന് മോചിപ്പിച്ചിരുന്നു. മറ്റൊരു മുന്‍ മുഖ്യന്ത്രിയും പി.ഡി.പി നേതാവുമായ മെഹബൂബ മുഫ്തി ഇപ്പോഴും തടങ്കലിലാണ്. ഇവരെ മോചിപ്പിക്കണമെന്നാവശ്യപ്പെട്ട് സുപ്രീംകോടതിയുടെ പരിഗണനയില്‍ നിരവധി ഹരജികളുണ്ട്.സമ്പൂര്‍ണ അടച്ചുപൂട്ടല്‍ ലംഘനം;
സംസ്ഥാനത്ത് 402 കേസുകള്‍