മുതലമട: റോഡരുകില്‍ മാലിന്യ നിക്ഷേപം. പരാതിയുമായി നാട്ടുകാര്‍. മംഗലം ഗോവിന്ദാപുരം റോഡരുകില്‍ പാപ്പാന്‍ ചള്ളക്കു സമീപത്താണ് വര്‍ക്ക്‌ഷോപ്പ് മാലിന്യങ്ങള്‍ വന്‍തോതില്‍ നിക്ഷേപിച്ചിട്ടുള്ളത്. വെള്ളി രാത്രിയില്‍ മൂന്ന് ടിപ്പറുകളിലായാണ് അജ്ഞാതര്‍ മാലിന്യങ്ങളെ സ്വകാര്യ വ്യക്തിയുടെ പറമ്പില്‍ നിക്ഷേപിച്ചിട്ടുള്ളതെന്ന് നാട്ടുകാര്‍ പറഞ്ഞു. കോട്ടയം എറണാകുളം ജില്ലകളിലെ വിലാസങ്ങള്‍ അടങ്ങിയ ബില്ലുകള്‍ മാലിന്യങ്ങളില്‍ കണ്ടെത്തി. ദുര്‍ഗന്ധം വമിക്കുന്ന മാലിന്യങ്ങളെ നിക്ഷേപിച്ചവര്‍ക്കെതിരേ നടപടിയെടുക്കണമെന്ന് പഞ്ചായത്ത് അംഗം ആര്‍. ബിജോയ് ആവശ്യപ്പെട്ടു. റോഡരുകിലെ മാലിന്യങ്ങള്‍ നീക്കം ചെയ്യണമെന്നാവശ്യപ്പെട്ടു കൊണ്ട് മുതലമട പഞ്ചായത്ത് സെക്രട്ടറിക്ക് നാട്ടുകാര്‍ പരാതി നല്‍കി.