കാബൂള്‍: കാബൂളിലെ സൈനിക ആശുപത്രിയില്‍ ഐ.എസ് നടത്തിയ ഭീകരാക്രമണത്തില്‍ മരിച്ചവരുടെ എണ്ണം 49 ആയി. സംഭവത്തില്‍ 90 പേര്‍ക്ക് പരുക്കേറ്റതായി ആരോഗ്യവിഭാഗം അധികൃതര്‍ അറിയിച്ചു.
ബുധനാഴ്ച വൈകിട്ടാണ് കാബൂളിലെ സര്‍ദാര്‍ മുഹമ്മദ് ദാവൂദ് ഖാന്‍ സൈനിക ആശുപത്രിക്കുനേരെ ആക്രമണമുണ്ടായത്. മൂന്നു ഭീകരരാണ് ആക്രമണം നടത്തിയത്.
ആദ്യത്തെയാള്‍ ആശുപത്രിക്കുമുന്നില്‍ ചാവേറായി പൊട്ടിത്തെറിച്ച ശേഷം മറ്റുള്ളവര്‍ അകത്തുകയറി വെടിയുതിര്‍ക്കുകയായിരുന്നു. ആശുപത്രിയിലെ ഡോക്ടര്‍മാരും ജീവനക്കാരുമാണ് കൊല്ലപ്പെട്ടവരില്‍ ഏറെയും. നിരവധി അഫ്ഗാന്‍ സൈനികര്‍ക്ക് പരുക്കേല്‍ക്കുകയും ചെയ്തു.
ആക്രമണത്തിന്റെ ഉത്തരവാദിത്തം ഏറ്റെടുത്ത ഐ.എസ് ആശുപത്രിക്കകത്തുവച്ച് എടുത്ത ചിത്രങ്ങള്‍ ഔദ്യോഗിക വെബ്‌സൈറ്റായ 'ആമാഖി'ല്‍ പ്രസിദ്ധീകരിച്ചിട്ടുമുണ്ട്. ആക്രമണത്തില്‍ പങ്കെടുത്ത അഞ്ചുഭീകരരുടെയും ചിത്രങ്ങളും ഇതോടൊപ്പം പുറത്തുവിട്ടു.