രാജപുരം: കുഞ്ഞിനെയും കൊണ്ട് ആശുപത്രിയിലേക്ക് പോകുകയായിരുന്ന കാര്‍ ജീപ്പിലിടിച്ച് കുഞ്ഞ് ഉള്‍പ്പെടെ നാലുപേര്‍ക്ക് പരുക്കേറ്റു. കോടോം എരുമകുളത്തെ കുഞ്ഞിക്കണ്ണന്‍ നായര്‍ (58), വിപിന്‍ രാജ് (38), ഭാര്യ ലയന (25), മകള്‍ ഇഷ (മൂന്നര) എന്നിവര്‍ക്കാണ് പരുക്കേറ്റത്.
കഴിഞ്ഞ ദിവസം ഇരിയ ബംഗ്ലാവ് വളവിലാണ് അപകടം. ഇഷയെ ഡോക്ടറെ കാണിക്കാന്‍ പുറപ്പെട്ടതായിരുന്നു കുടുംബം. കാഞ്ഞങ്ങാട് ഭാഗത്തുനിന്നു പാണത്തൂരിലേക്കു പോവുകയായിരുന്ന ജീപ്പാണ് ഇടിച്ചത്. ഇടിയുടെ ആഘാതത്തില്‍ കാറിന്റെയും ജീപ്പിന്റെയും മുന്‍ഭാഗം തകര്‍ന്നു. പരുക്കേറ്റവരെ പരിസരവാസികള്‍ ഉടന്‍ മാവുങ്കാല്‍ സ്വകാര്യ ആശുപത്രിയില്‍ എത്തിക്കുകയായിരുന്നു.