വാഷിങ്ടണ്‍: അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് പുറത്തിറക്കിയ പരിഷ്‌കരിച്ച യാത്രാവിലക്കും നിയമക്കുരുക്കിലേക്ക്. ഹവായ് സംസ്ഥാന ഭരണകൂടമാണ് പുതിയ എക്‌സിക്യൂട്ടിവ് ഉത്തരവിനെതിരേ ഫെഡറല്‍ കോടതിയില്‍ ഹരജി സമര്‍പ്പിച്ചിരിക്കുന്നത്.
തിങ്കളാഴ്ച ട്രംപ് ഒപ്പുവച്ച ഉത്തരവിനെതിരേ ഹവായ് അറ്റോര്‍ണി ജനറല്‍ 40 പേജുള്ള ഹരജിയാണ് സമര്‍പ്പിച്ചത്. ഹരജി കഴിഞ്ഞ ദിവസം ഫെഡറല്‍ ജഡ്ജി സ്വീകരിച്ചു. പഴയ മുസ്‌ലിം വിലക്കിന്റെ ആവര്‍ത്തനമാണ് പുതിയ ഉത്തരവെന്നും ഇത് തടയണമെന്നും ഹരജിയില്‍ ആവശ്യപ്പെടുന്നുണ്ട്.
ദേശീയതയുടെയും മറ്റും അടിസ്ഥാനത്തില്‍ വിവേചനം നടത്തുക വഴി ട്രംപിന്റെ എക്‌സിക്യൂട്ടിവ് ഉത്തരവിലെ രണ്ട്, ആറ് വകുപ്പുകള്‍ അമേരിക്കന്‍ ഇമിഗ്രേഷന്‍, നാഷനാലിറ്റി ആക്ടുകളുടെ നഗ്നമായ ലംഘനമാണെന്ന് ഹവായ് അറ്റോര്‍ണി ജനറല്‍ ഡഗ്ലസ് ചിന്‍ പറഞ്ഞു. പ്രസിഡന്റ് അമിതമായി അധികാരം പ്രയോഗിക്കുന്നതായും ഡഗ്ലസ് ആരോപിച്ചു. 20 ശതമാനം വിദേശികളായ സ്ഥിരതാമസക്കാരും ഒരു ലക്ഷം അമേരിക്കക്കാരല്ലാത്തവരുമുള്ള ഹവായിയുടെ വിനോദസഞ്ചാരമേഖലയെ നിയമം പ്രതികൂലമായി ബാധിക്കുമെന്നും ഹരജിയില്‍ ചൂണ്ടിക്കാട്ടുന്നു. ഈമാസം 16നു പുതിയ ഉത്തരവ് പ്രാബല്യത്തില്‍ വരുന്നതിനു മുന്‍പ് ഹരജിയില്‍ വാദംകേള്‍ക്കുമെന്ന് ഫെഡറല്‍ കോടതി ജഡ്ജി ഡെറിക് വാട്ട്‌സണ്‍ അറിയിച്ചു.
കഴിഞ്ഞ ജനുവരി 27ന് പ്രഖ്യാപിച്ച എക്‌സിക്യൂട്ടിവ് ഉത്തരവ് ഫെഡറല്‍ കോടതി സ്റ്റേ ചെയ്തതു മറികടക്കാനാണ് പുതുക്കിയ ഉത്തരവ് കഴിഞ്ഞ തിങ്കളാഴ്ച പുറത്തിറക്കിയത്. നേരത്തെ ഇറാന്‍, സുദാന്‍, യെമന്‍, ഇറാഖ്, സിറിയ, ലിബിയ, സോമാലിയ എന്നിങ്ങനെ ഏഴു മുസ്‌ലിം രാഷ്ട്രങ്ങളിലെ പൗരന്മാര്‍ക്ക് മൂന്നു മാസത്തേക്ക് അമേരിക്കയിലേക്ക് വിലക്കേര്‍പ്പെടുത്തിയതില്‍നിന്ന് ഇറാഖിനെ നീക്കിയായിരുന്നു പുതിയ ഉത്തരവ്. ഇതിനുപുറമെ സിറിയന്‍ അഭയാര്‍ഥികള്‍ക്കുണ്ടായിരുന്ന അനിശ്ചിതകാല വിലക്ക് നാലു മാസത്തേക്കു ചുരുക്കുകയും ചെയ്തിരുന്നു.
പഴയ ഉത്തരവിനെതിരേ ഐക്യരാഷ്ട്ര സഭയടക്കം രംഗത്തെത്തുകയും വൈറ്റ്ഹൗസിലെ ഉന്നതവൃത്തങ്ങള്‍ തന്നെ അഭിപ്രായ ഭിന്നത പ്രകടിപ്പിക്കുകയും ചെയ്തതോടെയാണ് പരിഷ്‌കരിക്കാന്‍ ട്രംപ് തീരുമാനിച്ചത്.
അമേരിക്കന്‍ സ്റ്റേറ്റ് സെക്രട്ടറി റെക്‌സ് ടില്ലേഴ്‌സന്‍, ആഭ്യന്തര സുരക്ഷാ മന്ത്രാലയം സെക്രട്ടറി ജോണ്‍ കെല്ലി, അറ്റോര്‍ണി ജനറല്‍ ജെഫ് സെഷന്‍സ്, ദേശീയ സുരക്ഷാ ഉപദേഷ്ടാവ് എച്ച്.ആര്‍ മക്ക്മാസ്റ്റര്‍ എന്നിവരെല്ലാം ഉത്തരവ് അമേരിക്കയുടെ ദേശീയ സുരക്ഷയ്ക്കു ഭീഷണിയാകുമെന്ന് അറിയിക്കുകയായിരുന്നു. ഐ.എസിനെതിരേ നടത്തുന്ന പോരാട്ടം പരിഗണിച്ച് ഇറാഖിനെ പട്ടികയില്‍നിന്ന് നീക്കണമെന്നും ഇവര്‍ ആവശ്യപ്പെട്ടിരുന്നു.