ആലപ്പുഴ: ജവഹര്‍ നവോദയ വിദ്യാലയങ്ങളില്‍ നിലനിന്നിരുന്ന സൗജന്യ വിദ്യാഭ്യാസം നിര്‍ത്തലാക്കി ഒരു വിഭാഗം വിദ്യാര്‍ഥികള്‍ക്കായി മാറ്റിയ കേന്ദ്ര മാനവവിഭവശേഷി മന്ത്രാലയത്തിനു കീഴിലുള്ള നവോദയ വിദ്യാലയ സമിതിയുടെ ഉത്തരവിനെതിരേ രക്ഷിതാക്കള്‍ പ്രതിഷേധത്തില്‍.
അധ്യയന വര്‍ഷം അവസാനിക്കാന്‍ മാസങ്ങള്‍ മാത്രം ബാക്കി നില്‍ക്കെ ഒരു വര്‍ഷത്തെ ഫീസടയ്ക്കാനുള്ള നിര്‍ദേശമാണ് രക്ഷിതാക്കള്‍ക്കു ലഭിച്ചിരിക്കുന്നത്. ഇതനുസരിച്ച് ഏതെങ്കിലും സര്‍ക്കാര്‍ - അര്‍ധസര്‍ക്കാര്‍ സ്ഥാപനങ്ങളില്‍ ജോലിയുള്ള ജീവനക്കാരുടെ മക്കള്‍ 1,500 രൂപ വീതം മാസം ഫീസ് നല്‍കണം.
കൂടാതെ ജനറല്‍ വിഭാഗം ആണ്‍കുട്ടികള്‍ അധികഫീസായി 600 രൂപയും അടയ്ക്കണം. ആറാം ക്ലാസ് മുതല്‍ 12-ാം ക്ലാസ് വരെ സൗജന്യ വിദ്യാഭ്യാസമെന്ന വാഗ്ദാനത്തിന്റെ ലംഘനമാണിതെന്ന് രക്ഷിതാക്കള്‍ വാര്‍ത്താ സമ്മേളനത്തില്‍ ചൂണ്ടിക്കാട്ടി.
ഉത്തരവിനെതിരേ സേവ് നവോദയ ഫോറം എന്ന പേരില്‍ സംഘടന രൂപീകരിച്ച് നവോദയ വിദ്യാലയ സമിതിക്കും കമ്മിഷണര്‍ക്കും പരാതിയയച്ചു. ഇതിനുപുറമെ കേന്ദ്ര വകുപ്പുമന്ത്രിയുടെയും എം.പിമാരുടെയും ശ്രദ്ധയില്‍പ്പെടുത്താനാണ് സംഘടനയുടെ തീരുമാനം.
ഉത്തരവു പിന്‍വലിച്ചില്ലെങ്കില്‍ കോടതിയെ സമീപിക്കുമെന്ന് സേവ് നവോദയ ഫോറം ഭാരവാഹികളായ ടി. വിക്രമന്‍, സജയരാജ്, എന്‍. വിജയകുമാര്‍, ചന്ദ്രബോസ്, എന്‍. അനില്‍കുമാര്‍, സുഭാഷ് തുടങ്ങിയവര്‍ വാര്‍ത്താ സമ്മേളനത്തില്‍ അറിയിച്ചു.