പെരുമ്പാവൂര്‍: വാഹന പരിശോധനക്കിടെ പൊലിസുകാരെ കൈയേറ്റം ചെയ്ത സഹോദരങ്ങള്‍ അറസ്റ്റില്‍. കണ്ണൂര്‍ സ്വദേശികളും ചെമ്പറക്കി നടക്കാവില്‍ വാടകയ്ക്ക് താമസിക്കുന്നവരുമായ ഞാറക്കാട്ടില്‍ ഷാജഹാന്റെ മക്കളായ നിഷാദ്(22), നിഷാദില്‍(20) എന്നിവരെയാണ് പൊലിസ് അറസ്റ്റ് ചെയ്തത്.

ചെമ്പറക്കിയില്‍ വാഹന പരിശോധനക്കിടെയാണ് യുവാക്കള്‍ പൊലിസിനോട് കയര്‍ത്തത്. ഇരുചക്രവാഹനത്തിലെത്തിയ ഇവര്‍ വീട്ടുസാധനങ്ങള്‍ വാങ്ങാനാണ് വന്നതെന്നാണ് പറഞ്ഞത്. വീട്ടുസാധനം വാങ്ങാന്‍ ഒരാള്‍ പോരെയെന്ന് പരിശോധിച്ച ഉദ്യോഗസ്ഥര്‍ ചോദിച്ചെങ്കിലും ഇവര്‍ ഇതൊന്നും ചെവിക്കൊള്ളാതെ കയര്‍ക്കുകയായിരുന്നു. 

പൊലിസ് കൂടുതല്‍ ചോദ്യം ചെയ്യുന്നതിനിടെ വിഷയം കയ്യാങ്കളിയില്‍ കലാശിച്ചു. പിന്നീട് ഉന്തുംതള്ളുമായി. നാട്ടുകാരും പൊലിസിനോടൊപ്പം ചേര്‍ന്നാണ് യുവാക്കളെ കീഴ്‌പ്പെടുത്തിയത്. പിന്നീട് കൂടുതല്‍ പൊലിസ് എത്തി ഇവരെ കസ്റ്റഡിയില്‍ എടുത്ത് സ്‌റ്റേഷനിലെത്തിക്കുകയായിരുന്നു. 

ഡ്യൂട്ടിക്ക് തടസം സൃഷ്ടിച്ചതുള്‍പ്പെടെ കേസ് ചാര്‍ജ് ചെയ്ത് കോടതിയില്‍ ഹാജരാക്കിയതിനെ തുടര്‍ന്ന് ഇരുവരേയും കാക്കനാട് ജയിലിലടച്ചു.