കൊച്ചി: കേരള പ്രീമിയര്‍ ലീഗിലെ തുടര്‍ച്ചയായ മൂന്നാം ഹോം മത്സരത്തിലും കൊച്ചിന്‍ പോര്‍ട്ട് ട്രസ്റ്റിന് തോല്‍വി. ഇന്നലെ ഫോര്‍ട്ട്‌കൊച്ചി വെളി ഗ്രൗണ്ടില്‍ നടന്ന എ ഗ്രൂപ്പിലെ മത്സരത്തില്‍ എതിരില്ലാത്ത നാലു ഗോളുകള്‍ക്കാണ് സാറ്റ് തിരൂരിനോട് പോര്‍ട്ട് ട്രസ്റ്റ് തോറ്റത്. ആദ്യ മത്സരത്തില്‍ കേരള പൊലീസിനോടും രണ്ടാം മത്സരത്തില്‍ എഫ്.സി തൃശൂരിനോടും സ്വന്തം തട്ടകത്തില്‍ പോര്‍ട്ട് ട്രസ്റ്റ് തോറ്റിരുന്നു. രണ്ടു എവേ മത്സരങ്ങളും തോറ്റ പോര്‍ട്ട് ട്രസ്റ്റിന് ഇതുവരെ പോയിന്റ് പട്ടികയില്‍ അക്കൗണ്ട് തുറക്കാനായിട്ടില്ല.
15ാം മിനുറ്റില്‍ ഷാഹിദാണ് തിരൂര്‍ സ്‌പോര്‍ട്‌സ് അക്കാദമിക്കായി ലീഡ് നേടിയത്. 55ാം മിനുറ്റില്‍ ഉനൈസും 80ാം മിനുറ്റില്‍ ഫസലു റഹ്മാനും എതിര്‍വല കുലുക്കി. കളിയുടെ അവസാന മിനുറ്റിലെ ഗോളിലൂടെ അസ്‌ലം സാറ്റിന്റെ ഗോള്‍ പട്ടിക പൂര്‍ത്തിയാക്കി. മെയ് ഏഴിന് ബ്ലാസ്റ്റേഴ്‌സ് റിസര്‍വുമായാണ് പോര്‍ട്ട് ട്രസ്റ്റിന്റെ അടുത്ത ഹോം മത്സരം. തൃശൂരില്‍ നടന്ന മറ്റൊരു മത്സരത്തില്‍ എഫ്.സി തൃശൂര്‍ കേരള പൊലിസിനെ ഒന്നിനെതിരെ രണ്ടു ഗോളുകള്‍ക്ക് തോല്‍പ്പിച്ച് പോയിന്റ് പട്ടികയിലെ ലീഡുയര്‍ത്തി.
ആറു കളിയില്‍ നിന്ന് 16 പോയിന്റാണ് ടീമിന്. പത്തു പോയിന്റുള്ള സാറ്റ് തിരൂരാണ് പട്ടികയില്‍ രണ്ടാം പടിയില്‍.