കൊട്ടാരക്കര: വീടില്‍ നടന്ന കവര്‍ച്ചയില്‍ 14 പവന്റെ സ്വര്‍ണാഭരണങ്ങളും 25000 രൂപയും നഷ്ടമായി. കാടാംകുളം വൈഷ്ണവ വിലാസത്തില്‍ സുരേഷ് ഗോപിയുടെ വീട്ടിലാണ് മോഷണം നടന്നത്. ഇന്നലെ പുലര്‍ച്ചെയായിരുന്നു മോഷണം.
വെള്ളിയാഴ്ച സുരേഷ് ഗോപി വീട്ടിലുണ്ടായിരുന്നില്ല. രാത്രി ഒരു മണിയോടെയാണ് ഇയാളുടെ ഭാര്യ ചന്ദ്രകുമാരിയും മക്കളും ഉറങ്ങാന്‍ കിടന്നത്. എന്നാല്‍ പുലര്‍ച്ചെ അഞ്ചിന് എഴുന്നേറ്റപ്പോള്‍ അലമാരകളും കതകും തുറന്ന് കിടക്കുന്നതാണ് കണ്ടത്. ശരീരത്ത് അണിഞ്ഞിരുന്നതും അലമാരയില്‍ സൂക്ഷിച്ചിരുന്നതുമായ ആഭരണങ്ങളും അലമാരയിലുണ്ടായിരുന്ന 25000 രൂപയുമാണ് മോഷ്ടാക്കള്‍ കവര്‍ന്നത്. കൊട്ടാരക്കര പൊലിസ് കേസെടുത്ത് അന്വേഷണം തുടങ്ങി. വിരലടയാള വിദഗ്ധരും ഡോഗ് സ്‌ക്വാഡും തെളിവെടുപ്പ് നടത്തി. കഴിഞ്ഞ ദിവസം നെടുവത്തൂര്‍ കുറുമ്പാലൂരിലും കോട്ടാത്തല യു.പി സ്‌കൂളിലും മോഷണം നടന്നിരുന്നു.