ഓക്ക്‌ലാന്‍ഡ്: ടി20 പരമ്പരയിലെ ആദ്യ മത്സരത്തിലേറ്റ പരാജയത്തിന് കണക്ക് തീര്‍ക്കാന്‍ ഇന്ത്യ ഇന്നിറങ്ങുന്നു. മൂന്ന് മത്സരങ്ങളുള്ള പരമ്പരയിലെ ആദ്യ മത്സരത്തില്‍ ഇന്ത്യക്ക് കനത്ത പരാജയമായിരുന്നു. ഇന്നത്തെ മത്സരത്തില്‍ ജയിക്കാനായാല്‍ മാത്രമേ ഇന്ത്യക്ക് പരമ്പര പ്രതീക്ഷിക്കാനാകൂ. ഏകദിന പരമ്പര നേടിയതിന്റെ ആത്മവിശ്വാസത്തിലാണ് ഇന്ത്യ ഇറങ്ങിയിരുന്നതെങ്കിലും ബാറ്റിങ് നിരയുടെ തകര്‍ച്ചയാണ് ഇന്ത്യയെ ആദ്യ മത്സരത്തില്‍ തോല്‍വിയിലേക്ക് നയിച്ചത്. 80 റണ്‍സിനായിരുന്നു ആദ്യ മത്സരത്തില്‍ കിവികള്‍ ഇന്ത്യയെ കശാപ്പ് ചെയ്തത്. ആദ്യ മത്സരത്തില്‍ എല്ലാ മേഖലയിലും ഇന്ത്യയെ നിഷ്പ്രഭരാക്കുന്ന പ്രകടനമായിരുന്നു കിവികള്‍ നടത്തിയത്. ആദ്യം ബാറ്റ് ചെയ്ത കിവീസ് നിശ്ചിത ഓവറില്‍ ആറു വിക്കറ്റിന് 219 റണ്‍സെടുത്തപ്പോള്‍ തന്നെ ഇന്ത്യയുടെ വിധി കുറിക്കപ്പെട്ടിരുന്നു. ടിം സെയ്‌ഫേര്‍ട്ടാണ് (84) ഇന്ത്യന്‍ ബൗളിങിന്റെ അന്തകനായത്. കോഹ്‌ലിയുടെ അസാന്നിധ്യം ഇന്ത്യക്ക് തിരിച്ചടിയാകുന്നുണ്ട്. എന്നാല്‍ അത് പരിഹരിക്കുന്ന തരത്തിലുള്ള നീക്കമായിരിക്കും ഇന്നത്തെ മത്സരത്തില്‍ നടത്തുകയെന്ന് പരിശീലകന്‍ പറഞ്ഞു.