ന്യൂഡല്‍ഹി: ഏഷ്യന്‍ കപ്പ് ഗ്രൂപ്പ് സ്റ്റേജിലെ പരാജയം ഫിഫ റാങ്കിങില്‍ ഇന്ത്യക്ക് തിരിച്ചടിയായി. റാങ്കിങില്‍ 97ാം സ്ഥാനത്തുണ്ടായിരുന്ന ഇന്ത്യ ആറ് സ്ഥാനങ്ങള്‍ പിറകോട്ടിറങ്ങി 103ാം സ്ഥാനത്തെത്തി. 1219 പോയിന്റാണ് ഇന്ത്യക്കുള്ളത്. ഇതോടെ എ.എഫ്.സി റാങ്കിങിലും ഇന്ത്യ പിന്തള്ളപ്പെട്ടു. ഏഷ്യന്‍ റാങ്കിങില്‍ ആദ്യ 15ലുണ്ടായിരുന്ന ഇന്ത്യ പുതിയ റാങ്കിങില്‍ 18ാം സ്ഥാനത്താണ്.
ഏഷ്യന്‍ രാജാക്കന്മാരായ ഖത്തറാണ് റാങ്കിങില്‍ കുതിച്ചുചാട്ടം നടത്തിയത്. 38 രാജ്യങ്ങളെ മറികടന്ന ഖത്തര്‍ 55ാം സ്ഥാനത്തെത്തി. 11 മത്സരങ്ങള്‍ കളിച്ച ഖത്തറാണ് റാങ്കിങില്‍ ഏറ്റവും കൂടുതല്‍ പോയിന്റ് (140) നേടിയത്. 1993ന് ശേഷം ആദ്യമായാണ് ഖത്തര്‍ ആദ്യ 55 സ്ഥാനങ്ങളില്‍ ഇടംപിടിച്ചത്. 1993ല്‍ 54ാം റാങ്കിലെത്തിയതാണ് ഖത്തറിന്റെ ഏറ്റവും വലിയ നേട്ടം. 2006ല്‍ 58ാം സ്ഥാനത്തെത്തിയ ഖത്തര്‍ 2010ല്‍ 112ാം സ്ഥാനത്തെത്തിയിരുന്നു. ഏഷ്യന്‍ കപ്പില്‍ ഒരു മത്സരത്തില്‍ പോലും പരാജയമറിയാതെയാണ് ഖത്തര്‍ കിരീടത്തില്‍ മുത്തമിട്ടത്. ഇതാണ് ഖത്തറിന് തുണയായത്.
റാങ്കിങ്ങില്‍ ബെല്‍ജിയം തന്നെയാണ് ഒന്നാം സ്ഥാനത്ത്. 12 സ്ഥാനം പിറകോട്ടിറങ്ങിയ ഉത്തര കൊറിയ 121ാം സ്ഥാനത്തെത്തി. 109ാം സ്ഥാനത്തായിരുന്ന ഉത്തര കൊറിയക്കും ഏഷ്യ കപ്പിലെ വമ്പന്‍ പരാജയമാണ് തിരിച്ചടിയായത്. ഏഷ്യന്‍ കപ്പ് റണ്ണേഴ്‌സ് അപ്പായ ജപ്പാന്‍ 23 സ്ഥാനങ്ങള്‍ കയറി 27ലെത്തി. ദക്ഷിണ കൊറിയ 15 സ്ഥാനം മുന്നോട്ട് വന്ന് 38ലെത്തി. 12 റാങ്കുകള്‍ കയറിയ യു.എ.ഇ 67ലും ജോര്‍ദാന്‍ 97ലുമെത്തി.