വടകര: ഒഞ്ചിയം പഞ്ചായത്തിലെ മാടാക്കര പ്രദേശത്ത് വര്‍ഷങ്ങളായി പ്രവര്‍ത്തിച്ച് കൊണ്ടിരിക്കുന്ന മാടാക്കര മാപ്പിള എല്‍.പി സ്‌കൂള്‍ വാടക കെട്ടിടം ഒഴിപ്പിക്കുന്നതിന് ഉടമ കോടതിയില്‍ നല്‍കിയ കേസില്‍ അനകൂല വിധി സമ്പാദിച്ചതിന്റെ പേരില്‍ അടിയന്തരമായി സ്‌കൂള്‍ കെട്ടിടം ഒഴിപ്പിക്കാനുള്ള വിദ്യാഭ്യാസ വകുപ്പിന്റെ ഉത്തരവ് ഉടന്‍ പിന്‍വലിക്കണമെന്ന് ആര്‍.എം.പി.ഐ. ഒഞ്ചിയം ഏരിയാ കമ്മിറ്റി പ്രസ്താവനയില്‍ പറഞ്ഞു. വര്‍ഷങ്ങളായി സ്‌കൂള്‍ നിലനിര്‍ത്താന്‍ വേണ്ടി പഞ്ചായത്ത് കക്ഷി ചേര്‍ന്ന് കേസ് നടത്തി കൊണ്ടിരിക്കുകയാണ്. ഏറ്റവും ഒടുവിലത്തെ ഹൈക്കോടതി വിധി വന്നതിനെതിരെ നിയമ വശങ്ങള്‍ പരിശോധിച്ച് സ്‌കൂള്‍ നിലനിര്‍ത്താന്‍ ആവശ്യമായ ഇടപെടല്‍ നടത്താന്‍ പഞ്ചായത്ത് ഭരണസമിതി തീരുമാനിക്കുകയും കാര്യങ്ങള്‍ മുന്നോട്ട് പോവുകയും ചെയ്യുന്ന സമയത്താണ് സി.പി.എം ഇടപെടലിന്റെ ഭാഗമായി അടിയന്തര ഒഴിപ്പിക്കല്‍ നടപടിയുമായി വിദ്യാഭ്യാസ വകുപ്പ് മുന്നോട്ട് വന്നത്.
ആക്ഷന്‍ കമ്മിറ്റിയെയും പഞ്ചായത്ത് ഭരണ സമിതിയെയും തമ്മില്‍ ഭിന്നിപ്പിച്ച് ഒഞ്ചിയത്ത് അഞ്ചാം വാര്‍ഡില്‍ നടക്കുന്ന ഉപതിരഞ്ഞെടുപ്പില്‍ രാഷ്ട്രീയ മുതലെടുപ്പ് നടത്താനുള്ള ഗൂഢ തന്ത്രത്തിന്റെ ഭാഗമാണ് ഇന്ന് സ്‌കൂളില്‍ നടന്ന രാഷ്ട്രീയ നാടകമെന്ന്് ആര്‍എംപിഐ കുറ്റപ്പെടുത്തി. സ്‌കൂള്‍ നിലനിര്‍ത്താന്‍ സിപിഎമ്മിന് ആത്മാര്‍ത്ഥത ഉണ്ടെങ്കില്‍ സ്വന്തം സര്‍ക്കാറിനെ കൊണ്ട് ഉത്തരവ് മാറ്റിക്കാനുള്ള ഇടപെടലാണ് നടത്തേണ്ടത്. സ്‌കൂള്‍ നിലനിര്‍ത്താനുള്ള നിയമ പോരാട്ടം തുടരണമെന്നും ജനങ്ങളില്‍ വിഭാഗീയത ഉണ്ടാക്കാനുള്ള ഹീന ശ്രമത്തിനെതിരെ ജനങ്ങള്‍ ജാഗ്രത പാലിക്കണമെന്നും ആര്‍.എം.പി.ഐ ഒഞ്ചിയം ഏരിയാ കമ്മിറ്റി പ്രസ്താവനയില്‍ ആവശ്യപ്പെട്ടു.