ചെറുവത്തൂര്‍: അനധികൃത മണല്‍ കടത്തിനെതിരേ ശക്തമായ നടപടിയുമായി ചന്തേര പൊലിസ്. രേഖകളില്ലാതെ മണല്‍ കടത്തിയ ഏഴു ലോറികള്‍ പിടികൂടി. കര്‍ണാടകയില്‍ നിന്നു മണലുമായി വന്ന നാലു ലോറികള്‍ ചെറുവത്തൂര്‍ ഞാണങ്കൈയില്‍ നിന്നാണു ചന്തേര എസ്.ഐയുടെ നേതൃത്വത്തിലുള്ള സംഘം പിടികൂടിയത്. ഇന്നലെ പുലര്‍ച്ചെ നാലരയോടെയാണു ചെറുവത്തൂര്‍ ചെക്‌പോസ്റ്റില്‍ നിര്‍ത്താതെ ലോറികള്‍ കണ്ണൂര്‍ ജില്ലയിലേക്കു കടക്കാന്‍ ശ്രമിച്ചത്.
ഇതിനു പിന്നാലെ മാച്ചിക്കാട്, ഓരി എന്നിവിടങ്ങളില്‍ നിന്നായി മൂന്നു ലോറികള്‍ കൂടി പിടികൂടി. ജില്ലയില്‍ മണലെടുപ്പിനു കര്‍ശന നിയന്ത്രണമുള്ളതിനാല്‍ കര്‍ണാടകയില്‍ നിന്നു കണ്ണൂര്‍, കാസര്‍കോട് ജില്ലകളിലേക്കുള്ള മണല്‍ ലോറികള്‍ ചെക്ക് പോസ്റ്റുകളില്‍ നിര്‍ത്താതെ ഓടിച്ചു പോവുന്ന സാഹചര്യത്തിലാണു പരിശോധന കര്‍ശനമാക്കിയത്.