അമ്പലപ്പുഴ: മഴ കനത്തതോടെ വണ്ടാനം മെഡിക്കല്‍ കോളജ് ആശുപത്രി കെട്ടിടത്തിനുള്ളിലെ മാലിന്യവും കൊതുകും കൂത്താടികളും രോഗികളുടെ ഉറക്കം കെടുത്തുന്നു. വണ്ടാനം മെഡിക്കല്‍ കോളേജ് ആശുപത്രിയിലെ അത്യാഹിത വിഭാഗങ്ങള്‍ക്ക് സമീപമുള്ള നാലുകെട്ടിനുള്ളില്‍ നിക്ഷേപിച്ചിരിക്കുന്ന മാലിന്യങ്ങളാണ് രോഗികള്‍ക്ക് ദുരിതമാകുന്നത്. ആശുപത്രിയിലെ ഒരു വിഭാഗം ക്ലീനിംഗ് തൊഴിലാളികള്‍ തന്നെയാണ് ഇവിടെ മാലിന്യം നിക്ഷേപിക്കുന്നത്.
മാലിന്യത്തില്‍ നിന്ന് കൊതുകുകളും കൂത്താടികളും പെരുകി സമീപത്തെ ഒന്ന്, 14, 15, 16, 17 വാര്‍ഡുകളില്‍ കഴിയുന്ന രോഗികള്‍ക്കാണ് ദുരിതം നല്‍കുന്നത്.
മാലിന്യം കൂട്ടിയിട്ടിരിക്കുന്ന ഭാഗത്താണ് അത്യാഹിത വിഭാഗങ്ങളും കുട്ടികളുടെ തീവ്രപരിചരണ വിഭാഗവും സ്ഥിതിചെയ്യുന്നത്. ഒരു വര്‍ഷം മുമ്പ് ആശുപത്രയിലെ ശുചിത്വം വിലയിരുത്താന്‍ ജില്ലാകലക്ടര്‍ എന്‍.പത്മകുമാര്‍ എത്തിയപ്പോള്‍ പലഭാഗങ്ങളിലായി മാലിന്യം കുന്നുകൂടി കിടക്കുന്നതു കണ്ട് നടപടി സ്വീകരിച്ചിരുന്നു.
നൂറോളം തൊഴിലുറപ്പ് തൊഴിലാളികളെ പ്രദേശം ശുചീകരിക്കാന്‍ നിയോഗിക്കുകയും ഇനിയും ഇതുപോലെ മാലിന്യം തള്ളരുതെന്നും ആശുപത്രി വളപ്പ് മാലിന്യമുക്തമായിരിക്കണമെന്നും അദ്ദേഹം നിര്‍ദ്ദേശം നല്‍കുകയും ചെയ്തിരുന്നു. ഈ ഉത്തരവ് കാറ്റില്‍ പറത്തിയാണ് ഇവിടുത്തെ ക്ലീനിംഗ് തൊഴിലാളികള്‍ ആശുപത്രി വളപ്പില്‍തന്നെ പലഭാഗങ്ങളിലായി മാലിന്യം നിക്ഷേപിച്ചിരിക്കുന്നത്. ആശുപത്രി അധികൃതര്‍ മാലിന്യ നിക്ഷേപം കണ്ടില്ലെന്ന് നടിക്കുകയാണ്.
കൂടാതെ ശുചിമുറിയിലെ പൈപ്പ് പൊട്ടിയതിനെ തുടര്‍ന്ന് ആശുപത്രിയില്‍ മലിനജലം പ്രവഹിക്കുന്നുണ്ട്. ആശുപത്രിയിലെ നിരീക്ഷണ മുറിയോട് ചേര്‍ന്നുള്ള കക്കൂസിലെ പൈപ്പാണ് പൊട്ടിയൊലിക്കുന്നത്. അത്യാഹിതവിഭാഗത്തിന്റെ കവാടത്തിലും എക്‌സറേ ലാബിലുമായാണ് മലിനജലം ഒഴുകിയെത്തുന്നത്.