നീലേശ്വരം: കടലില്‍ മീന്‍ പിടിക്കുന്നതിനെ ചൊല്ലി തര്‍ക്കമുണ്ടായതിനെത്തുടര്‍ന്ന് നീലേശ്വരം തൈക്കടപ്പുറം സ്വദേശിയെ കണ്ണൂരില്‍ നിന്നെത്തിയ മത്സ്യബന്ധന തൊഴിലാളികള്‍ തട്ടിക്കൊണ്ടു പോയി കണ്ണൂര്‍ സിറ്റി പൊലിസ് സ്റ്റേഷനിലേല്‍പ്പിച്ചു. കഴിഞ്ഞ ദിവസമായിരുന്നു നീലേശ്വരത്ത് നാടകീയ രംഗങ്ങള്‍ അരങ്ങേറിയത്. കണ്ണൂരില്‍ നിന്നെത്തുന്ന മത്സ്യബന്ധന ബോട്ടുകള്‍ തൈക്കടപ്പുറം പുറംകടലില്‍ മീന്‍ പിടിക്കുന്നതാണു തര്‍ക്കത്തിനു കാരണമായത്. കണ്ണൂരില്‍ നിന്നെത്തിയവരെ തൈക്കടപ്പുറത്തുകാര്‍ ഉപദ്രവിക്കാന്‍ ശ്രമിച്ചതോടെ തൈക്കടപ്പുറത്തെ പ്രജീഷിനെ ബോട്ടില്‍ പിടിച്ചുകയറ്റി കണ്ണൂരില്‍ നിന്നെത്തിയവര്‍ പോകുകയായിരുന്നുവത്രേ. നീലേശ്വരം പൊലിസാണ് ഇദ്ദേഹത്തെ തിരിച്ചെത്തിച്ചത്. ഇരു വിഭാഗത്തിനും പരാതികളില്ലാത്തതിനാല്‍ കേസെടുത്തില്ല.