തൃശൂര്‍: വഴിത്തര്‍ക്കത്തെത്തുടര്‍ന്ന് യുവതിയെ തോര്‍ത്തുമുണ്ട് കഴുത്തില്‍ ചുറ്റി ശ്വാസം മുട്ടിച്ച് കൊലപ്പെടുത്താന്‍ ശ്രമിച്ച കേസിലെ പ്രതിക്ക് ഒരു വര്‍ഷം നല്ല നടപ്പിന് ശിക്ഷ. മുന്‍വൈരാഗ്യം വെച്ചു പീച്ചി സ്വദേശിനിയെ കൊലപ്പെടുത്താന്‍ ശ്രമിച്ചതിനു പീച്ചി അംബേദ്കര്‍ കോളനിയില്‍ മുല്ലശ്ശേരി വീട്ടില്‍ നെഹ്‌റു (55) നെയാണ് 10,000 രൂപയ്ക്കുള്ള ബോണ്ടിന്‍മേല്‍ ഒരു വര്‍ഷം നല്ലനടപ്പിനു തൃശൂര്‍ നാലാം അഡീഷണല്‍ ജില്ലാ ആന്‍ഡ് സെഷന്‍സ് ജഡ്ജ് കെ.ആര്‍ മധുകുമാര്‍ ശിക്ഷിച്ചു.  2011 ജൂലായ് 11നു വൈകീട്ട് ആറിനാണു കേസിനാസ്പദമായ സംഭവം നടന്നത്. പരാതിക്കാരി ആടിനെ തീറ്റുന്നതിനു പുഴക്കരയിലേക്കു പോകുന്ന വഴിയില്‍ വെച്ചു നെഹ്‌റുവും യുവതിയും തര്‍ക്കമുണ്ടായി. ഇതിനെത്തുടര്‍ന്നു യുവതി പൊലിസ് സ്റ്റേഷനില്‍ പ്രതിക്കെതിരേ പരാതി നല്‍കി. ഈ വിരോധമാണ് നെഹ്‌റുവിന്റെ ആക്രമണത്തിനു കാരണമായത്. സംഭവദിവസം യുവതി ആടിനെ അഴിച്ചു തിരിച്ചു വരുമ്പോള്‍ അതു വഴി വന്ന നെഹ്‌റു തോര്‍ത്തുമായി യുവതിയുടെ കഴുത്തില്‍ചുറ്റി ശ്വാസം മുട്ടിച്ചു കൊലപ്പെടുത്താന്‍ ശ്രമിക്കുകയായിരുന്നു.  കുതറി മാറുന്നതിനിടയില്‍ പ്രതിയുടെ പിടിവിടുകയും അതിനിടയില്‍ യുവതി ഓടി രക്ഷപ്പെടുകയുമായിരുന്നു.
തുടര്‍ന്ന് കഴുത്തില്‍ വേദനയും ശ്വാസതടസവും അനുഭവപ്പെട്ടതിനെത്തുടര്‍ന്ന് യുവതിയെ ആശുപത്രിയില്‍ പ്രവേശിപ്പിച്ചു. പീച്ചി സബ് ഇന്‍സ്‌പെക്ടരായിരുന്ന ജെ.ആര്‍ രഞ്ജിത്കുമാര്‍ രജിസ്റ്റര്‍ ചെയ്ത കേസില്‍ സര്‍ക്കിള്‍ ഇന്‍സ്‌പെക്ടറായ സി.എം ദേവദാസനാണ് കേസന്വേഷണം നടത്തിയത്. വിവാഹപ്രായമായ മകളും ചെറിയ മകനും കര്‍ഷകനായ തന്നെ ആശ്രയിച്ചാണ് ജിവിച്ചു വരുന്നതെന്ന നെഹ്‌റുവിന്റെ അപേക്ഷ പരിഗണിച്ചാണ് കോടതി ശിക്ഷ നല്ല നടപ്പാക്കി കുറച്ചത്.