കഠിനംകുളം: ബസ് യാത്രക്കിടയില്‍ വിദ്യാര്‍ഥിനിയെ അശ്ലീല വീഡിയോ കാണിച്ച് അപമാനിക്കാന്‍ ശ്രമിച്ച മധ്യവയസ്‌കന്‍ പിടിയില്‍ . കീഴാറ്റിങ്ങല്‍ സ്വദേശി അശോകനാണ് പിടിയിലായത്.
ഇന്നലെ വൈകിട്ട് തിരുവനന്തപുരത്ത് നിന്ന് അടൂരിലേക്ക് പുറപ്പെട്ട ഫാസ്റ്റ് പാസഞ്ചര്‍ ബസിലാണ് സംഭവം. ഭിന്നഷേശിക്കാരിയായ മൂന്നാം വര്‍ഷ ഹോമിയോ വിദ്യാര്‍ഥിനിയെയാണ് ഇയാള്‍ അപമാനിച്ചത്. വിദ്യാര്‍ഥിനിയോടൊപ്പം സീറ്റില്‍ ഇരിക്കുകയായിരുന്ന ഇയാള്‍ ദേഹസ്പര്‍ശനത്തിനൊപ്പം തന്റെ മൊബൈലിലെ അശ്‌ളീല ചിത്രവും വീഡിയോയും കാണിച്ചുവെന്നാണ് പരാതി.
ക്ഷുഭിതയായ വിദ്യാര്‍ഥിനി ഉന്നത പൊലീസ് ഉദ്യാഗസ്ഥരെ ഫോണില്‍ വിളിച്ച് ഇക്കാര്യം അറിയിക്കുകയായിരുന്നു. വിവരമറിഞ്ഞ കഴക്കൂട്ടം എ.സി എ. പ്രമോദ്കുമാറിന്റെ നേതൃത്വത്തിലുള്ള പൊലീസ് കാര്യവട്ടത്ത് വച്ച് ബസ് തടഞ്ഞ് ഇയാളെ കസ്റ്റഡിയിലെടുത്തു.
കഴക്കൂട്ടം പൊലീസ് സ്റ്റേഷന് മുന്നില്‍ ബസ് നിര്‍ത്തിച്ച് ചാത്തന്നൂര്‍ക്കാരിയായ വിദ്യാര്‍ഥിനി ഇതുസംബന്ധിച്ച് പരാതിയെഴുതി നല്‍കി. സംഭവത്തെ തുടര്‍ന്ന് നിറയെ യാത്രകാരുമായി വന്ന ബസ് ഒരുമണിക്കൂറോളം കഴക്കൂട്ടം പൊലീസ് സ്‌റ്റേഷനില്‍ മുന്നില്‍ നിര്‍ത്തിയിടേണ്ടി വന്നു. അതേ സമയം യുവതി എഴുതി നല്‍കിയ പരാതി സ്റ്റേഷനിലുണ്ടായിരുന്ന എസ്.ഐ വാങ്ങാതെയും സംഭവത്തെ കുറിച്ച് അന്വേഷിക്കാതെ ജീപ്പുമെടുത്ത് മുങ്ങിയതായും ആക്ഷേപമുണ്ട്.